«Ազգային առաջընթաց» կուսակցության նախընտրական շտաբի ղեկավար եւ լրատվության պատասխանատու Հայկ Գրիգորյանը Aravot.am-ի հետ զրույցում ասաց, որ նորընտիր խորհրդարանը չի արտահայտում այն սպասելիքները, որը կունենար միջին վիճակագրական քաղաքացին:
«Երկու հին ուժերի` ԲՀԿ–ի եւ «Լուսավոր Հայաստանի», կրկին խորհրդարան թափանցելը բացասական ենք գնահատում: Դրական ենք գնահատում, որ ՀՀԿ–ն եւ ՀՅԴ–ն խորհրդարան չանցան: Լավ է, որ «Իմ քայլը» մեծամասնություն կլինի խորհրդարանում: Կարող ենք փաստել, որ ժողովուրդն ազատ ընտրություն կատարեց, բայց այն արդար չէր, ու պատճառն էլ այն էր, որ Սահմանադրությունն ու Ընտրական օրենսգիրքը փոխված չէին, ու կապիտալի ազդեցությունը նվազեցված չէր ընտրական պրոցեսի վրա»,-ընդգծեց «Ազգային առաջընթացի» ներկայացուցիչը` հավելելով, որն այս պատկերը մասնակիորեն կանխատեսելի էր:
Ինչ վերաբերվում է իրենց ուժին, Հայկ Գրիգորյանը նշեց. «Մենք չէինք արել հայտարարություն, թե ինչքան ձայն ենք ստանալու, հետեւաբար չենք արձանագրում` լա՞վ է, վա՞տ է, շա՞տ է, թե՞ քիչ… Մենք մեր արդյունքներով բավարարված ենք, ու սա մեր առաջին քայլն էր քաղաքականության մեջ: Չենք կարծում, որ վատ էր, թեեւ կարող էր ավելի լավ լինել: Բայց հաշվի առնելով օբյեկտիվ հանգամանքները` կարճ ժամանակը, սեւ–սպիտակի պայքարը, Նիկոլ Փաշինյանի լեզվակռիվները, այդ ամենը հաշվի առնելով` փաստում ենք, որ այդ արդյունքն ենք ստացել»:
Մեր զրուցակիցը չի կարծում, թե ընտրողների մասնակցության ցուցանիշը ցածր է: Ասում է, որ նախ ընտրողների 2,5 մլն թիվն ուռճացված է, այդքան մարդ չի ապրում Հայաստանում, հետո էլ. «Պետք է հաշվի առնել, թե մարդկանց նախկինում ինչպես էին բերում ընտրատեղամասեր»:
Գոհար ՀԱԿՈԲՅԱՆ
Լուսանկարը` Հայկ Գրիգորյանի ֆեյսբուքյան էջից:
