«Իհարկե, չեմ բացառում, որ մանր՝ թեթեւ խնդիրներ եղել են, բայց կարեւորն այն է, որ դրանք համակարգային չեն եղել եւ չեն ուղղորդվել որեւէ կենտրոնից»,-քվեարկության օրվա ավարտին այսօր լրագրողների հետ զրույցում ասաց «Իմ քայլը» դաշինքի պատգամավորի թեկնածու Լենա Նազարյանը: Նրա խոսքով. «Այդ խնդիրները պայմանավորված են եղել վարկանիշային թեկնածուների գործողություններով, որոնք ոստիկանության կողմից կանխվել են, իսկ ընտրողների կողմից՝ սահմանափակվել, եւ իրականում ընտրությունների արդյունքների վրա էական ազդեցություն չեն ունեցել»:
Հարցին՝ նոր խորհրդարանում «Իմ քայլը» դաշինքը կնախաձեռնի՞ ԸՕ փոփոխություններ, այդ թվում՝ վարկանիշային ընտրակարգի վերացումը, Լենա Նազարյանը դրական պատասխան տվեց. «Ոչ միայն ընտրական կարգը փոխելու մասին է խոսքը: Շատ այլ հնարավորություններ կարելի է ավելացնել՝ փոքր կամ նոր ստեղծվող կուսակցությունների համար: Կարեւոր է, որ քաղաքական դաշտն առողջանա»:
Լրագրողները հետաքրքրվեցին՝ ճի՞շտ է տեղեկությունը, որ նոր խորհրդարանում Լենա Նազարյանը զբաղեցնելու է ԱԺ նախագահի կամ նրա տեղակալի պաշտոնը: «Ես ԱԺ նախագահի իմ թեկնածուն ունեմ եւ դա ես չեմ: Դեռ քննարկումներ ենք անում: Ինձ, միանշանակ, տեսնում եմ խորհրդարանում»,-պատասխանեց նա:
Լուիզա ՍՈՒՔԻԱՍՅԱՆ
