Քաղաքագետ Ստեփան Դանիելյանը Aravot.am-ի հետ զրույցում՝ մեկնաբանելով ընտրություններին մասնակցության ոչ բարձր ցուցանիշն, ասաց. «Եթե մարդիկ չեն գնացել քվեարկելու կամ չեն ցանկանում մասնակցել, պասիվ են, կամ էլ որոշել են, որ ընտրելու բան չունեն: Քանի որ ընտրացուցակում չկա «բոլորին դեմ» նշումը, մարդիկ այդ «բոլորին դեմ եմ»-ը արտահայտում են ընտրության չգնալով»:
Քաղաքագետն ասաց, որ ընտրությանը չգնալը բնավ էլ ապատիայի ու հիասթափության արդյունք չէ. «Ուղղակի մարդիկ չեն տեսնում այն կուսակցությունը, որն արտահայտում է իրենց կարծիքը կամ տրամադրությունը»:
Նա այս մասնակցության ցածր ցուցանիշի մասին գրառում է կատարել ֆեյսբուքի իր էջում՝ ընդգծելով, որ ընտրություններին չմասնակցելը նույնպես ընտրություն է:
«Քաղաքական համակարգը փլուզված է, և մարդիկ առհասարակ կուսակցություններին չեն վստահում, այդ թվում նաև ՔՊ-ին: Մարդիկ քվեարկելու են ընդամենը Նիկոլի ցուցակի օգտին` ով որ քվեարկի: Մի հսկա զանգված չի մասնակցելու ընտրություններին, ու դա հիմնականում գիտակցված քայլ է: Նիկոլի վարկանիշի անկման դեպքում անիմաստ է դառնում Նիկոլի ցուցակով կազմված խորհրդարանը:
Պատահական չէր, որ ՔՊ-ի հիմնական կոչն այն էր, որ դուք ընտրում եք վարչապետ: Սակայն սա խորհրդարանի ընտրություն է, այլ ոչ թե վարչապետի: Փաստորեն խորհրդարանի ընտրությունը վերածվել է անձի ընտրության: Սա է այս ընտրությունների հիմնական կազուսը: Սա ժամանակավոր` ճգնաժամային պառլամենտ է լինելու: Ընտրությունները պետք է գարնանը տեղի ունենային, հիմա անցկացնելը մեծագույն սխալ էր»,-գրել է Ստեփան Դանիելյանը:
Գոհար ՀԱԿՈԲՅԱՆ
Թույլ տվեք չհամաձայնվել ձեզ հետ։
Պարզապես ընտրացուցակում եղած, բայց չքվեարկած ընտրողների կեսից ավելին արտերկրում է, և քվեարկելու հնարավորություն չի ունեցել։ Իսկ նրանց Հայաստանից դուրս գտնվելը, երկրի իշխանությունների ոչ ազգանպաստ քաղաքականության հետևանքն է։