«2/41 տեղամասի մոտ մի մարդ մի խումբ ընտրողների բաժանել է թղթեր, որից հետո նրանք մտել են տեղամաս ընտրելու։ Դեպքին ականատես է եղել Մարիամ Ղարագյոզյանը, որը ընտրել՝ դուրս էր եկել։ Դիմել է ոստիկանին, որը պարզել և ասել է, որ ըստ բնակության վայրի տեղեկանքներն է տվել, որ կարողանան ընտրել էդ տեղամասում ու իրան չի հետաքրքրել, թե ինչ գործ ունի էդ մարդը տեղեկանքների հետ։ Ոստիկանը ներկայացել է որպես Արտավազդ Հակոբյան»,- իր ֆեյսբուքյան էջում նման գրառում է կատարել «Քաղաքացու որոշում» նախընտրական ցուցակում ընդգրկված Կարեն Հարությունյանը։
Ընտրախախտումների մասին, սա թեկնածուի միակ գրառումը չէ: Ըստ Կարեն Հարությունյանի, իրենք մի քանի տեղից ահազանգ են ստացել, որ դրսում կանգնած են մարդիկ, որոնց մոտենում են տեղամասից դուրս եկած ընտրողներ և ցույց տալիս քվեաթերթիկները, որոնց մեջ բացակայում է իրենց ընտրածը։ «Առայժմ չենք ասում, թե ում քվեաթերթիկն է բացակայում։ Ըստ երևույթին՝ սիստեմատիկ բնույթ է կրում»,- գրել է թեկնածուն։
Նա նաեւ ահազանգել է, որ Առինջում տեղակայված 29/28 տեղամասում պարբերաբար 2 հոգով են մտնում քվեախցիկի հետևը։
«Քաղաքացու որոշում» կուսակցության գրասենյակում Aravot.am-ին փոխանցեցին, որ այս եւ այլ խախտումների մասին իրենք ահազանգեր են ստացել: Այժմ փորձում են ճշտել դրանց իսկությունը: Ավելի ուշ, ընտրախախտումների մասով հայտարարություն կտարածեն:
Նելլի ԳՐԻԳՈՐՅԱՆ
