10/33-ում հանձնաժողովի նախագահը վիճում է լրագրողի հետ, թե՝ կարեւոր գործ էի անում, պահանջում է իրեն գրանցել. «Գալիս, լցվում են իմ սեղանին» (ֆոտոշարք, տեսանյութ)

10/33 տեղամասում աշխատելուց առաջ, ինչպես պահանջվում է, հորդորեցինք հանձնաժողովի քարտուղարին գրանցել, որ աշխատենք:

Որոշ ժամանակ անց հանձնաժողովի նախագահը՝ Նարինե Սահակյանը սկսեց իր սեղանի մոտ ինչ-որ թուղթ ման գալ ու բողոքել, թե «չի համբերում, մենք կարեւոր գործ ենք անում, եկել է, ասում է՝ ինձ գրանցեք, գալիս, լցվում են իմ սեղանին, ասում ՝ ինձ գրանցեք, ոնց որ ինքը ամենակարեւոր մարդն ա ստեղ: Շատ լուրջ բան ես լրացնում, եկել է՝ ես պիտի աշխատեմ, ես էլ եմ աշխատում, հարգելի՛ս»:

Մենք ճշտեցինք՝ մե՞զ նկատի ունի, պարզվեց՝ այո: Նա շարունակեց դժգոհել ու մուննաթ գալ:

Մանրամասները՝ տեսանյութում:

Ի դեպ, այս ընտրատեղամասում կուտակումներ էին, տարածքն այնքան փոքր էր, որ հանձնաժողովի անդամները, ընտրողները կարող էին տեսնել, թե ինչպես էր քվեարկում մյուս ընտրողը: Ընտրողները քվեախցիկից դուրս կատարում էին իրենց ընտրությունը՝ առանձնացնելով թիվ 4 քվեաթերթիկը մյուսներից: Իսկ հանձնաժողովի նախագահը «կարեւոր գործով» էր զբաղված:

Երբ հարցրեցինք՝ խախտո՞ւմ է եղել, ինչ-որ միջադե՞պ է եղել, որ այդպես անհանգստացած արձանագրություն է կազմում՝ նա պատասխանեց, որ ոչ:

Հռիփսիմե ՋԵԲԵՋՅԱՆ