Շիրակի փոխմարզպետ Արա Մելիքջանյանը, որը «Իմ քայլը» դաշինքի վարկանիշային թեկնածուներից մեկն է, իր ֆեյսբուքյան էջում լուսանկար էր հրապարակել հիվանդասենյակից՝ գրելով․ «Դուխով, ցավոք․ չեմ կարող ակտիվ մասնակցել այս չափազանց կարևոր օրը»։
Մենք այցելեցինք Գյումրի բժշկական կենտրոն՝ ճշտելու, թե ո՞րն է պատճառը հիվանդանոց պառկելու, արդյո՞ք որևէ միջադեպ չի եղել։
Փոխմարզպետը տեղեկացրեց, որ երկու օր է՝ բարձր ջերմություն ունի, 40 աստիճանից չի իջնում, հնարավոր է մրսել է քարոզարշավի ընթացքում, և ստիպված կաթիլային է ընդունում։
Արա Մելիքջանյանը հենց այսօր դուրս գրվեց հիվանդանոցից՝ ընտրություններից հետո հետագա բուժումը շարունակելու։
Ի դեպ, մենք Գյումրի բժշկական կենտրոնի փոխտնօրեն Արմեն Խաչատրյանից ճշտեցինք, որ թիվ 32/26 ընտրական հանձնաժողովի անդամները՝ վստահված անձանց և ոստիկանության ուղեկցությամբ, ցուցակով 11 շրջիկ թերթիկ են բերել հիվանդանոց, սակայն երեք հիվանդ դուրս են գրվել, և քվեարկել են 8-ը։
«Այն հիվանդները, որոնք գամված են անկողնում, քվեարկել են իրենց հիվանդասենյակում, իսկ մյուսների համար առավելագույն, նորմատիվներին մոտ պայմաններ ենք ստեղծել, որպեսզի ոտքի վրա գտնվող հիվանդները գան, ընտրեն»,-տեղեկացրեց Արմեն Խաչատրյանը։
Նունե ԱՐԵՎՇԱՏՅԱՆ
Լուսանկարը՝ Արա Մելիքջանյանի ֆեյսբուքյան էջից
