«Բարգավաճ Հայաստան» կուսակցությունից ԱԺ արտահերթ ընտրությունների պատգամավորի թեկնածու, կուսակցության նախագահ Գագիկ Ծառուկյանի թիկնազորի պետ Էդուարդ Բաբայանը ընտրությունը կատարելուց հետո պատասխանել է «Ազատության» հարցերին, որից ներկայացնում ենք մի հատված:
-Այս անգամ դուք էլ «Բարգավաճ Հայաստան» կուսակցության համամասնական ցուցակում եք, ինչպես նաեւ Կոտայքի մարզում ռեյտինգային թեկնածու եք: Ինչո՞ւ որոշեցիք առաջադրվել, ինչո՞վ ձեզ գայթակղեց, ինչո՞վ գրավեց պատգամավորի աշխատանքը:
-Ինձ աբովյանցիները ստիպեցին, որ պատգամավորության թեկնածու լինեմ, դրա համար էլ դրեցի:
-Ինչպե՞ս ստիպեցին: Ասացին ձեր պակասը զգացվո՞ւմ է Ազգային ժողովում:
-Նման բան չկար: Ուղղակի ասացին՝ ուզում ենք, որ դու էլ լինես պատգամավոր: Միշտ մեզ օգնում ես, պատգամավոր որ գնաս՝ ավելի շատ օգնես:
-Իսկ Ծառուկյանի թիմը չէ՞ր կարող օգնել, օժանդակել:
-Ես ծնվել, մեծացել եմ էս քաղաքում, ինձ բոլորը ճանաչում են: Խնդրեցին ինձ, ես էլ չմերժեցի մեր ժողովրդին:
-Պարոն Բաբայան: Հուլիսին դեպք եղավ, որ ձեզ ձերբակալեցին քաղաքացու նկատմամբ բռնություն կատարելու մեղադրանքով: Քրեական գործը դեռ շարունակվում է: Թեեւ դուք գրավի դիմաց ազատ արձակվեցիք, բայց դեռ գործով մեղադրյալ եք: Այս հանգամանքը, արդյոք, չխանգարե՞ց ձեզ:
-Չէ, քննությունը դեռ գնում է: Ես մի անգամ արդեն լրագրողի հարցին պատասխանել եմ, որ եթե ապացուցվի դա, ես մանդատս էլ վայր կդնեմ, որ չասեն՝ գնում է դեպուտատ, որ անձեռնմխելի լինի:
-Գուցե կարող էիք սպասել եւ մյուս ընտրություններում առաջադրվել, այդ քրեական գործն ավարտվեր՝ նոր…
-Էդ քրեական գործը ինչ է խանգարում: Վարույթը դեռ գնում է: Ես պիտի սպասեի անցներ՝ նո՞ր:
-Ամեն դեպքում բնութագրումներ եղան, կարծիքներ հնչեցին, որ անձեռնմխելի դառնալու համար եք փորձում պատգամավոր դառնալ:
-Ես արդեն ասացի. եթե հարկ լինի, ես մանդատս վայր կդնեմ:
-Պարոն Բաբայան: Դուք էլ եք գործարարությամբ զբաղվում, բիզնեսներ ունեք…
-Ոչ, ես բիզնես չունեմ:
-Դուք ուզում եք գնալ եւ խորհրդարանական աշխատանքո՞վ զբաղվել…
-Հլը որ եդ եմ ուզում: Հետո կնայենք ոնց կլինի:
-Ձեր անունը անընդհատ շրջանառվում էր այս կամ այն քրեական միջադեպերի հետ կապված: Դուք իսկապե՞ս պնդում եք, որ անձեռնմխելիության համար չեք գնում խորհրդարան:
-Նորից ասեմ, եթե ապացուցվեց, որ ես մեղավոր եմ՝ Սլավիկն անընդհատ ասում է, որ Էդոն էնտեղ չի եղել, որ ինքը դեղերի ազդեցության տակ է եղել: Եթե ապացուցվի, պատրաստ եմ մանդատս վայր դնել, եթե դա է ձեզ անհանգստացնում:
-Եթե ընտրվեք, ինչպե՞ս եք պատկերացնում ձեր աշխատանքը: Օրինակ, «Բարգավաճ Հայաստանի» առաջնորդ Գագիկ Ծառուկյանը խորհրդարան չի գալիս եւ օրենսդիր գործունեությամբ չի զբաղվում:
-Իսկ ինչի՞ չի գալիս: Պիտի անպայման նստե՞ս խորհրդարանում: Մարդը գնացել է արտասահման, էդքան պատգամավորներա հրավիրել մեր երկիր, տարելա Ղարաբաղ: Մարդը գործով է զբաղվում չէ՞: Էնպես չի որ պիտի գնար՝ նստեր ենտեղ:
Աշոտ ՀԱԿՈԲՅԱՆ
