Այսօր 9/49 եւ 9/50 ընտրատեղամասի մոտ, երբ ՀՀԿ թեկնածու Դավիթ Շահնազարյանը լրագրողների հետ էր զրուցում, ընտրողներից մեկը, տեսնելով Շահնազարյանին՝ բղավեց՝ ամո՛թ քեզ, ամո՛թ: Նա ասաց՝ «Կեցցե Նիկոլը»: Դավիթ Շահնազարյանն էլ հեգնեց՝ ասելով. «Էդ որ ասում եք՝ կեցցե Նիկոլը, կեցցե-ն 2 ց-ով ասեք, մի ց-ով չի կարելի»:
Մեկ այլ քաղաքացի ասաց՝ «Չեք էլ ամաչում»: Դավիթ Շահնազարյանն ասաց. «Ես իրենց խղճում եմ»: Քաղաքացին սկսեց բողոքել՝ «ժողովրդին կերաք, թալանեցիք»: Դավիթ Շահնազարյան էլ պատասխանեց. «Ժողովրդին ամբոխի հետ չշփոթե՛ս, տղա՛ ջան, ես խղճում եմ քեզ»:
Ըստ Դավիթ Շահնազարյանի, այս միջադեպը պատահական չէր:
Քաղաքացին շարունակեց վիճել Շահնազարյանի հետ՝ մեղադրելով, որ նրա աղջիկը ամբողջ օրը Աննա Հակոբյանի հետ է, մտերիմ է: Դավիթ Շահնազարյանն ասաց, որ եթե ոստիկանությունը չմիջամտի, ինքը կլուծի հարցերը. «Բայց այստեղ կարող է մարմնական վնասվածքներ լինեն»:
Նա, այնուամենայնիվ, պատասխանեց դստեր հետ կապված պնդմանը: Ի դեպ, Շահնազարյանի դուստրը իր կողքին կանգնած էր. «Փաշինյանի հրահանգով մեծ քանակությամբ ստոր ստեր տարածվեցին իմ եւ իմ ընտանիքի անդամների վերաբերյալ: Բոլորն եմ հերքում, բայց այդ ստեր տարածողներին…ես նրանց ընտանիքի անդամներին ամենայն բարիք ու առողջություն եմ ցանկանում: Հրապարակումներից մեկում նշված էր, որ իմ դուստրը Փաշինյանի, նրա կնոջ հետ հարաբերություններ ունի: Նախ, եթե ունի, դա ի՞նչ կապ ունի քաղաքականության հետ, երկրորդը՝ այդ լուսանկարները, որոնք հրապարակել էին, 2008-2009-ի հանրահավաքների լուսանկարներ էին»:
Հռիփսիմե ՋԵԲԵՋՅԱՆ
