Aravot.am-ն ահազանգ էր ստացել այն մասին, որ երեկ Լոռու մարզի Բովաձոր համայնքի նախկին ղեկավար, ՀՅԴ-ական Էդիկ Մելիքսեթյանը համայնքի բնակիչների մի մասին ընտրակաշառք է բաժանել: Ըստ զանգահարողի՝ խոսքը 10-20 000 դրամի մասին է:
Կապվեցինք Էդիկ Մելիքսեթյանի հետ: Նա նախ հետաքրքրվեց. «Իսկ ո՞նց անենք, որ հերքենք…ավելի ճիշտ՝ այդ լուրը տարածողին գտնենք»: Պատասխանեցինք, որ իրավունք ունենք տեղեկատվության աղբյուրը չբացահայտել: Մելիքսեթյանն արձագանքեց. «Այդ դեպքում ես էլ իրավունք ունեմ ասեմ, որ չի եղել նման բան, այդ սուտ բաների վրա մի հիմնվեք, ես շահագրգռվածություն անգամ չունեմ»:
Էդիկ Մելիքսեթյանից նաեւ տեղեկացանք, որ Բովաձորը ներառվել է համայնքների խոշորացման ծրագրում, եւ ինքը հիմա զբաղեցնում է Բովաձորի ղեկավարի տեղակալի պաշտոնը:
Լուիզա ՍՈՒՔԻԱՍՅԱՆ
Լուսանկարը՝ Բովաձոր համայնքի ֆեյսբուքյան էջից
