ՀՀ վարչապետի ժամանակավոր պաշտոնակատար Նիկոլ Փաշինյանն այսօր լրագրողների հետ ճեպազրույցում անդրադարձավ ՀՀԿ ցուցակը գլխավորող Վիգեն Սարգսյանի այն հայտարարությանը, որ քարոզարշավի ընթացքում «Իմ քայլը» դաշինքը վարչական ռեսուրս է կիրառել: «Եթե նման փաստեր պարզվեն, կիրառողները կպատժվեն»,-նկատեց Փաշինյանը:
Ինչ վերաբերում է ԲՀԿ պատգամավորի թեկնածու Նաիրա Զոհրաբյանի այն պնդմանը, թե մարզպետների մակարդակով համայնքապետերին հանձնարարական է եղել՝ ապահովել ձայներ «Իմ քայլի» օգտին, Փաշինյանը նշեց. «Եթե կոնկրետություն լինի, եւ եթե այդ կոնկրետությունն իր մեջ ապօրինություն ունի…մեր մարզպետերը քարոզարշավ են իրականացրել օրենքով սահմանված կարգով, նրանց մեծ մասը թեկնածու է, արձակուրդում է եղել այս ընթացքում: Ուստի տրամաբանական չէր լինի, եթե նրանք քարոզարշավի ընթացքում իրենց ուժի օգտին չաշխատեին»:
Փաշինյանը հիշեցրեց. «Քարոզարշավի ժամանակ ասել եմ՝ ՀՀ քաղաքացիներին որեւէ մեկը չի կարող ասել, թե ում օգտին պետք է քվեարկեն: Կարծում եմ՝ դրանով ամեն ինչ ասված է»:
Ինչ վերաբերում է հարցադրումներին, թե ինչու մինչ օրս ՀՀ երրորդ նախագահ Սերժ Սարգսյանի հանդեպ որեւէ քրեական գործ չի հարուցվել, Փաշինյանը պատասխանեց. «Դա եւս մեկ ապացույց է, որ քննչական մարմինները գործում են ոչ թե ըստ իմ հայտարարությունների, այլ ձեռքի տակ եղած փաստական տվյալների»:
Լուիզա ՍՈՒՔԻԱՍՅԱՆ
