«Ես առավոտյան ժամը 10-ին մտել եմ ընդեղ (ընտրատեղամաս-Ն. Գ.) ժողովրդին բարեւել եմ, ուրախ ընտրություն եմ ցանկացել, նստել եմ մեքենան ու եկել եմ Էջմիածնի իմ տուն` գյուղից տասը կիլոմետր հեռու»,- Aravot.am-ի հետ զրույցում ասաց Արմավիրի մարզի Տարոնիկ գյուղի գյուղապետ Արմեն Խլղաթյանը:
Բանն այն է, որ քիչ առաջ ահազանգեր եղան այն մասին, որ Տարոնիկի գյուղապետն ընտրատեղամասի մոտ կանգնած`ընտրողներին ուղղորդում է, որպեսզի քվեարկեն իշխող «Իմ քայլը» դաշինքի վարկանիշային թեկնածու Նարեկ Մկրտչյանի (լուսանկարում) օգտին:
Արմեն Խլղաթյանը հավաստիացնում է, որ ժամը 11-ից իր տանն է եւ տանից դուրս չի եկել, ընտանիքի անդամներն էլ կարող են վկայել:
«Իմ քայլի» թեկնածու Նարեկ Մկրտչյանն էլ Aravot.am-ի հետ զրույցում ասաց, որ ինքն այդ ահազանգերին ի պատասխան արդեն հայտարարություն տարածել է`ընտրողներին հորդորելով, որ եթե նման դեպքեր կան, ապա դիմեն ոստիկանություն. «Ոստիկանությունը թող գա եւ տեղում հարցերը լուծի: Տարոնիկի գյուղապետի հետ ես ոչ մի առնչություն չունեմ: Բայց ահազանգերից հետո իմ ներկայացուցիչներն այցելել են այդ տեղամաս, պարզվել է, որ գյուղապետն առավոտյան է եկել ընտրատեղամաս, հետո, գնացել է: Ժամը 11.00-ից հետո ինքն այդ համայնքում չի եղել, գնացել է Էջմիածին քաղաքում գտնվող իր տուն»:
Նարեկ Մկրտչյանը հավաստիացրեց`ինքը դեմ է վարչական ռեսուրսի կիրառմանը եւ հետամուտ է լինելու, որ նման խախտումների մեղավորները պատժվեն`օրենքով սահմանված կարգով:
Նելլի ԳՐԻԳՈՐՅԱՆ
