«Շատ լավ տրամադրությամբ եմ եկել քվեարկության. գիտեք՝ ինչքան եմ երազել այս օրվա մասին, որ մեր ժողովուրդն առանց ճնշումների, առանց փող վերցնելու, առանց խախտումների, հանգիստ, իր կամքով գա ընտրության»,- 13/13 ընտրատարածքում քվեարկությունից հետո հայտարարեց ՄԵՆՔ դաշինքը գլխավորող Արամ Սարգսյանը:
Նա հավաստիացրեց՝ իր կյանքի տասնութ տարիները նվիրել է դրան: Արամ Սարգսյանն ասաց՝ միշտ գերկարևոր է համարել արդար ընտրությունները. «Երկրում արդար ընտրություններ լինեն, մնացած ամեն ինչ տեղը կընկնի: Միշտ էլ այն կարծիքին եմ եղել, որ ելքը թե′ դահլիճում է, թե′ դրսում, ու լավ արդյունք տալու ելքը բոլորով ենք տալու: Միանշանակ այսօրվա և ապագայի, անցյալի թողածը լավ հիշողությունները վառ պահելու և դրանք շարունակելու համար եմ քվեարկել»:
Արամ Սարգսյանը նկատեց՝ իր մասնակցած ընտրությունների լավագույն քարոզարշավն էր քարոզիչների հավասարության, հնարավորությունների և ամեն ինչի առումով. «Միակ թերությունը, որից անընդհատ բողոքում էին, կարճ ժամանակն էր: Միգուցե դա մեզ համար նշանակություն ուներ, քանի որ ՄԵՆՔ-ը նոր ձևավորված էր, բայց մնացած առումով, կարծում եմ նրանք, որոնք հանրությանը հայտնի էին, նրանց համար դա էլ խոչընդոտ չէ»:
Հիշեցմանը՝ ՀՀԿ-ականները բարձրաձայնում էին պաշտոնական դիրքի չարաշահումների մասին, Արամ Սարգսյանն արձագանքեց. «Ցանկացած մեկը կարող էր բարձրաձայնել դրա մասին բացի ՀՀԿ-ից. իրենք լավ կանեն լռեն այդ առումով. սիրուն չէ՝ կասեր իրենց կուսակցության ղեկավար Սերժ Սարգսյանը:
Տաթև ՀԱՐՈՒԹՅՈՒՆՅԱՆ
Լուսանկարը՝ Արամ Սարգսյանի ֆեյսբուքյան էջից
