«Շարժումը մի զգայուն կետը մյուսին կապելու գործընթացն է: Այդ զգայուն լարման կետերը քաղաքային տեղանքն են, անկյունը, որտեղ կա հիշողություն, կռիվ, զգացում, և այլ նման անկյուններին կապվելու կարիք ունեն։ Շարժումը դիմադրության արդյունք է: Շարժումը փոփոխության կարևորագույն գործոնն է, այն երբեք չի դադարելու»,-ահա թե ինչպես է մեկնաբանում ցուցահանդեսի անվանումը նկարիչ Պետո Պողոսյանը:
ՀԲԸՄ պատկերասրահը դեկտեմբերի 5-13-ը ներկայացնում է Պետո Պողոսյանի «Շարժում» անհատական ցուցահանդեսը, որտեղ արտացոլված են տարբեր տարիների քաղաքացիական նախաձեռնությունները, բողոքի ցույցերը, շարժումները, լարված իրավիճակները պատկերող 22 աշխատանքներ` ընդհուպ մինչև 2018թ. մայիսի Թավշյա հեղափոխությունը:
Ցուցահանդեսը բացվում է «Հիշողությունը չես կարող տեղափոխել» և «Էլեկտրիկ Երևան» անվանմամբ երկու հսկայական վերատպություններով: «Հիշողությունը ուղղակի անհնար է տեղափոխել կամ ջնջել»,- ահա թե ինչպես է նկարիչը մեկնաբանում նկարի անվանումը:
Նկարչի նախընտրելի արտահայտչամիջոցը ջրաներկն է, որի շերտ առ շերտ թափանցիկ վրձնահարվածների միջոցով նա պատկերում է այն հետքերի ողջ խորությունը, որ թողել են վերջին քաղաքացիական նախաձեռնությունները:
Պետոն ցանկանում է ցույց տալ մարդկությունը «շարժման» մեջ, կլինի դա քաղաքական, ֆիզիկական կամ պատկերավոր: Նա պատկերում է փողոց դուրս եկած զանգվածներին՝ երթի ժամանակ, նստած վիճակում, անձրևի կամ արևի տակ, որոնք ձգտում են տարիներ շարունակ կուտակված ուժի միջոցով հասնել փոփոխությունների:
Նա մեջբերում է, որ ցանկացած նկար իր և այլոց կյանքից վերցրած մի պատմություն է, և մի փոքրիկ դրվագ, որի վերլուծությունը նա ներկայացրել է իր արվեստի միջոցով: Անհնար է նայել նկարներին առանց վերապրելու որևէ դրվագ ձեր իսկ կյանքից:
Պետո Պողոսյանն իր ջրաներկ աշխատանքներով ներկայացել է տարբեր հեղինակավոր միջազգային ցուցադրությունների և բիենալեների, այդ թվում Շանհայի միջազգային բիենալե (2011թ.), Շենզենի միջազգային բիենալեն (2013թ.), ԱՄՆ ազգային ջրաներկի ասոցիացիայի միջազգային ցուցադրություն (2015թ.), «Ջրաներկի վարպետներ» հրավիրյալ միջազգային ցուցահանդես (Սանկտ-Պետերբուրգ, 2017թ.) և այլն:
Ցուցահանդեսի վաճառքից որոշակի գումար կհատկացվի Սպիտակի երկրաշարժի հետևանքների վերացմանը:
Աննա ՀԱԿՈԲՅԱՆ
Լուսանկարները՝ petopoghosyanfineart.com-ից
