Այսօր Գյումրու քաղաքապետարանում կառավարության արտագնա նիստ անցկացնելու հետո շենքից ոտք դնելուն պես՝ նամակները ձեռքերին, բողոք ունեցող գյումրեցիները շրջապատեցին վարչապետի պաշտոնակատար Նիկոլ Փաշինյանին: Վերջինս շատ էր շտապում, քանի որ ուղիղ 11.40 հարգանքի տուրք պիտի մատուցեր երկրաշարժի զոհերի հիշատակին:
Այդուհանդերձ, նա մի պահ կանգնեց, վերցրեց նամակները, նոր հեռացավ: Նամակ հանձնող կանանցից մեկից հետաքրքրվեցինք, թե ի՞նչ պահանջ ունի վարչապետից:
Կինն ասաց. «Անօթևան եմ, 30 տարի շարունակ հարցս չի կարգավորվում, ուզում ենք, որ մեր տները կառուցվի, տղաս առաջին խմբի հաշմանդամ է, բանակում ծառայության ժամանակ է ցավը ձեռք բերել, ազատամարտիկի այրի եմ ես, իմ ամուսինը Ղարաբաղում է կռվել: Ո՞րն ասեմ, ցավդ տանեմ, մենք էլ իրան սիրող, հարգող ողջունողներն էինք: Երբ մարտի վերջ Գյումրի եկավ, ես եմ եղել այն կնիկը, ասողը՝ էն ում թագավորն է , կուգա ու էդպես էլ ինքը եղավ թագավոր: Ու պիտի լինի թագավոր մեր օգնության, մեր ջանքերի շնորհիվ»:
Նամակ հանձնող մի տարեց կինն էլ ասաց, որ իր տղան բանակ գնալով՝ հաշմանդամ է դարձել: «Մինչև հիմի տունը նստած է, չորս պատ չեն տա, որ էրեխես ապրի, թափառական ուլիցներն ենք»,- դժգոհեց կինը:
Ամենափրկիչ եկեղեցու բակում՝ երկրաշարժի զոհերի հիշատակը հարգելուց հետո էլ բնակիչները փորձեցին շրջափակել Նիկոլ Փաշինյանին: Նրան մոտեցավ մի փոքրիկ տղա՝ արտասվախառն ձայնով բացականչելով՝ «Պարոն Փաշինյան, պարոն Փաշինյան»: Վարչապետը նրան վերցրեց իր հետ՝ իր մեքենայի մեջ լսելով նրա խնդիրը:
Շառլ Ազնավուրի հրապարակում, որտեղ կառավարության անդամները Նիկոլ Փաշինյանի գլխավորությամբ ծաղիկներ խոնարհեցին մեծն Շանսիոնեի հիշատակին, նոր միայն մեքենայից իջեցրեցին տղային: Տղան լրագրողներին ասաց, որ 14 տարեկան է, Հրանտ Չալոյանն է, բնակվում է Ախուրյանում, վարչապետի մոտ եկել էր մենակ, առանց ծնողների, նրա փոխանցել է իր խնդրանքը: Իսկ թե ինչ էր խնդրում, տղան ասաց. «Կներեք, անձնական է, չեմ ասի»:
Վարչապետի մեքենան շրջափակեցին նաև Գյումրու Բուլվարային թաղամասում՝ արտակարգ իրավիճակների նախարարության կազմակերպած ցուցադրական վարժանքը դիտելուց հետո: Մեկը բողոքեց, թե Գյումրու սանմաքրումում է աշխատում ու 55 հազար դրամ աշխատավարձ է ստանում, շատ ցածր է, ընտանիքը պահելու խնդիր ունի: Լիքը մարդիկ էին հավաքվել Բուլվարային թաղամասում՝ վարչապետին իրենց խնդիրները փոխանցելու, սակայն Նիկոլ Փաշինյանն ասաց. «Ժողովուրդ ջան, ես ժամանակի խնդիր ունեմ» ու հեռացավ:
Նիկոլ Փաշինյանն այսօր շրջեց նաև Գյումրու պատմական փողոցներում, որտեղ շինաշխատանքներ են ընթանում: Նա Գյումրու քաղաքապետ Սամվել Բալասանյանից հստակեցրեց, թե ե՞րբ է ավարտվելու շինարարությունը: Լրագրողներից մեկը Նիկոլ Փաշինյանից հետաքրքրվեց, թե կուզենա՞ր տուն ունենալ Գյումրու պատմական միջուկում, նա ժպտաց ու անպատասխան թողեց հարցը:
Նունե ԱՐԵՎՇԱՏՅԱՆ
