«Զորամասում բուտերբրոդներ չեն բաժանվել, նյութն անգամ իր վերնագրով և բովանդակությամբ վիրավորական է, քանզի հայ զինվորը դրան արժանի չէ ու բուտերբրոդի կարիք չունի, առավելևս, նրա ձայնը բուտերբրոդի չափով գնահատելը նսեմացնող է Հայոց բանակի համար…»,- Aravot.am-ին ուղարկած նամակում գրել է Թիվ 12 ընտրատարածքում «Իմ քայլի» պատգամավորի թեկնածուներից Կարեն Համբարձումյանը:
Հերքումը վերաբերվում է «Նախընտրական բուտերբրոտների Սիսիանում» վերնագրով երեկ տպագրված լուրին: Հրապարակմամբ տեղեկացրել էինք, որ նախկին ԲՀԿ-ական մարզպետ, այժմ «Իմ քայլի» թեկնածու Կարեն Համբարձումյանի հայրը`նախկին ԲՀԿ-ական Հովիկ Համբարձումյանը, Սիսիանի զորամասում բուտերբրոտներ է բաժանել:
Aravot.am-ը կապվել էր Հովիկ Համբարձումյանի հետ`ճշտելու լուրի իսկությունը: Նա հարցը լսելուց հետո, ասաց, որ շատ զբաղված է եւ չի կարող խոսել, ապա երկու նախադասություն «շպրտեց» ու անջատեց հեռախոսը: «Ես զորամասի տեղը չգիտեմ հարգելիս, եթե մեկը կլինի`ես էս մարդուն դեմքով ճանաչում եմ, ես կգնամ ինքնասպան կլինեմ, հենց ըտենց էլ գրեք»,- ասաց նա`իր մասին «ապատեղեկատվություն տարածողների» հասցեին վիրավորական արտահայտություններ «շռայլելով»:
«Ճիշտ չէ նաև հորս վերաբերող տեղեկությունը. հայտնում եմ, որ հայրս՝ Հովիկ Համբարձումյանը ոչ միայն տեղամասային հանձնաժողովի նախագահ չէ, այլ նույնիսկ հանձնաժողովի անդամ չէ»,-Aravot.am-ին ուղարկած նամակում գրում է Կարեն Համբարձումյանը:
ԲՀԿ-ից Aravot.am-ի հարցին ի պատասխան տեղեկացրեցին, որ ի սկզբանէ Հովիկ Համբարձումյանն իրենց կուսակցության կողմից նշանակված է եղել հանձնաժողովի նախագահ, հետո, կկուսակցությունում փոխել են որոշումը եւ Հովիկ Համբարձումյանի փոխարեն այլ մարդու են նշանակել:
