Նախընտրական քարոզարշավն այսօր ամփոփեցին նաեւ «Սասնա ծռերը»՝ այս քարոզարշավը մի քանի քայլ առաջ որակելով նախկինում անցկացված բոլոր նախընտրական քարոզարշավներից:
Կուսակցության ցուցակը գլխավորող Վարուժան Ավետիսյանը ընտրություններին մասնակցող ուժերը դասակարգեց երեք խմբի. առաջին՝ «մարտի մեկի» կոալիցիան, նախկինից ժառանգած տատանվող ուժեր, որոնք, օլիգարխիկ տարբեր շրջանակների հետ կապի մեջ են. «Խոսքը «Լուսավոր Հայաստան» կուսակցության մասին է, որը մարտնչող ոճով փորձում է այն ուժի նկատմամբ սեւացնող քարոզչություն անել, որը եղել է հեղափոխության ակունքներում, բացի այդ տեսանք՝ այդ ուժը փողոցում մենակ թողեց Նիկոլ Փաշինյանին, դավաճանելով հայտնվեց խորհրդարանում ու փորձեց խրատ տալ հեղափոխական ժողովրդին»։
Երրորդ ուժերը, ըստ Վարուժան Ավետիսյանի, երիտասարդ ուժերն են, որոնք, չկարողացան մասնակցել ընտրություններին:
Կուսակցության պատգամավորի թեկնածուներն ամփոփիչ ասուլիսում նաեւ հայտնեցին, որ այս օրերին Շիրակի ու Կոտայքի մարզերում կաշառքի բաժանման մասին ահազանգեր ստացել, բայց դատախազությունն արագ արձագանքել է ահազանգին, գործին ընթացք է տրվել: Ըստ նրանց՝ եղել են նաեւ դեպքեր, երբ իրենց նախընտրական պաստառներն են պոկվել, իսկ համացանցում ատելության քարոզ է տարվել իրենց ուժի նկատմամբ:
Արփինե ՍԻՄՈՆՅԱՆ
