Դեկտեմբերի 9-ին կայանալիք ԱԺ արտահերթ ընտրությունների քարոզարշավին մասնակցող «Մենք» դաշինքը, որը միավորում է «Հանրապետություն» եւ «Ազատ դեմոկրատներ» կուսակցություններին, առաջարկում է ավելացնել ՀՀ պայմանագրային զինծառայողների թիվը 20 հազարով` յուրաքանչյուր պայմանագրային զինծառայողի ամսական վճարելով 1000 դոլար: «Մենք»-ի պատգամավորի թեկնածու Արմեն Առաքելյանն Aravot.am-ի հետ զրույցում նշյալ առաջարկի մասին ասաց. «Նախկինում էլ շեշտել ենք, որ ՀՀ-ի պարագայում ճիշտը «պրոֆեսիոնալ բանակ» ունենալն է: Դա մարտունակության ուղիղ ճանապարհն է, իսկ 18 տարեկանները սպասարկող աշխատանք կարող են իրականացնել: «Խոպան» գնալու փոխարեն կարելի է եւ երկրի սահմանները պաշտպանել, եւ ընտանիք պահել»:
Արմեն Առաքելյանի անձնական համոզմունքն այն է, որ ՀՀ ԶՈՒ-ն պետք է առաջնորդվի բանակի «շվեյցարական մոդել»-ով. «Շվեյցարիայում բոլոր տղամարդիկ տանն ունեն մարտահագուստ եւ համապատասխան զինամթերք: Այսինքն, նրանք ամեն պահի պատրաստ են իրենց տունը, գյուղը կամ քաղաքը պաշտպանել: Ժամանակին Հիտլերը չհամարձակվեց Շվեյցարիա մտնել, քանի որ գիտեր՝ ամեն տուն «ամրոց» է, պետք է գրավել: Գտնում եմ, որ մենք էլ կարող ենք այս կերպ անել, եւ պարտադիր չէ զենքերը տանը պահել: Օրինակ՝ սահմանամերձ համայնքների պարագայում զինամթերքը կարելի է որոշակի տեղերում պահել»:
Ի դեպ, Արմեն Առաքելյանը հայտնեց, որ Շվեյցարիայում ավելի շատ հրաձգարան կա (14 .000), քան սրճարան եւ ռեստորան. «Ամեն գյուղ ունի իր հրաձգարանը, իսկ տղամարդիկ պարբերաբար մասնակցում են զորահավաքների»: Մեր զրուցակցի համոզմամբ, այս մոդելի կիրառման դեպքում Ադրբեջանը կգիտակցի, որ ամեն տուն գրավելու համար ստիպված է լինելու մարտ մղել:
Մանրամասն՝ տեսանյութում:
https://www.facebook.com/aravot.am/videos/271388876906954/
Լուիզա ՍՈՒՔԻԱՍՅԱՆ
