«Երկրաշարժի հետեւանքով անօթեւան ընտանիքներ չեն լինելու»,- այսպիսի խոստում լսել ենք գրեթե բոլոր համապետական ընտրություններում:
Մինչդեռ այսօր՝ Սպիտակի ավերիչ երկրաշարժից 30 տարի անց, փաստ է, որ բազմաթիվ ընտանիքներ դեռեւս ապրում են տնակներում։
2003 թվականին աղետի գոտին վերանվանվեց զարգացման գոտի, սակայն ընդամենը անունը փոխվեց. տնակների առկայությունը, այնտեղ ապրող մարդկանց անմարդկային կենցաղն ու երկրաշարժից մնացած շենքերի փլատակները մինչ օրս էլ աղետի գոտի են հիշեցնում:
Այս պահին Գյումրիում 2300 ընտանիք՝ մոտ տասը հազար անօթեւան կա: Տնակներում ապրողները երկրաշարժից տուժածների արդեն որերորդ սերունդն են: Ամեն նոր կառավարության օրոք մարզային իշխանությունները գալիս՝ գույքագրում են անում, տնակներն ու մարդկանց հաշվառում: Այս տարվա ապրիլից հետո էլ եկել, փաստաթղթեր են պահանջել, տնակներում ապրողները տրամադրել են, հույսով սպասում են:
Լուսանկարները` ԼՈՒՍԻՆԵ ԲՈՒԴԱՂՅԱՆԻ
«Առավոտ» օրաթերթ,
07.12.2018
