ԿԸՀ նախագահ Տիգրան Մուկուչյանն այսօր հանդիպեց ԱՊՀ դիտորդական առաքելության ղեկավար Վիկտոր Գումինիսկիի եւ առաքելության շտաբի ղեկավար Եվգենի Սլոբոդայի հետ:
Հանդիպումից հետո Վիկտոր Գումինիսկին լրատվամիջոցներին տեղեկացրեց, որ Տիգրան Մուկուչյանը իրեն ներկայացրել է Հայաստանի Հանրապետությունում ԱԺ արտահերթ ընտրությունների կազմակերպման ընթացքը: ԱՊՀ երկարաժամկետ դիտորդները Հայաստանի ժամանել են ՀՀ նախագահ Արմեն Սարգսյանի հրավերով եւ աշխատանքներին ձեռնամուխ են եղել նոյեմբերի 22-ին:
«Մեր առաքելության դիտորդները բարձր որակավորում եւ խորհրդարանական, նախագահական ընտրություններին հետեւելու մեծ փորձ ունեն: Այսօրվանից ժամանում են կարճաժամկետ դիտորդները, եւ մենք հնարավորություն ունենք դիտորդություն իրականացնել գործնականում բոլոր ընտրատարածքներում եւ այցելել ընտրատեղամասեր մեծ մասը:
Ուզում եմ ասել նաեւ հետեւյալը. աշխատելով նոյեմբերի 22-ից՝ մենք բարձր գնահատական ենք տալիս Հայաստանի ԿԸՀ աշխատանքին, որի տրամադրության տակ շատ քիչ ժամանակ կար: Սակայն ԿԸՀ-ն հսկայածավալ աշխատանք է կատարել, իր առջեւ դրված բոլոր խնդիրները լիովին լուծվել են, կազմակերպական բոլոր աշխատանքները կատարված են Հայաստանի ընտրական օրենսդրության պահանջների համապատասխան: Եվ այն, որ այսօրվա դրությամբ ընտրական հանձնաժողով ոչ թե դժգոհություն, այլ աննշան դիտողություն չկա, ասում է այն մասին, որ դեկտեմբերի 9-ին մարդիկ կարող են գնալ ընտրատեղամասեր եւ ազատ արտահայտել իրենց ձայնը տալ այս կամ այն քաղաքական ուժին: Ինչ մենք տեսնում ենք այսօր, վստահություն է ներշնչում, որ դեկտեմբերի 9-ին Հայաստանի ժողովուրդը կընտրի այն խորհրդարանը, որ ուզում է տեսնել», – ասաց ԱՊՀ դիտորդական առաքելության ղեկավարը:
Աշոտ ՀԱԿՈԲՅԱՆ
