«Ցանկացած ընտրության ժամանակ իշխանությանը մեղադրում են Արցախը ծախելու համար, իշխանությունն էլ ընդդիմությանը մեղադրում է օտարերկրյա գործակալ լինելու մեջ»,-Aravot.am-ի հետ զրույցում անդրադառնալով ՀՀԿ պատգամավորի թեկնածու, ԱԱԾ նախկին ղեկավար Դավիթ Շահնազարյանի պնդմանը, թե Նիկոլ Փաշինյանի իշխանությունն Արցախի հարցում դավադրություն է նախատեսում, ասաց «Մենք» դաշինքի պատգամավորի թեկնածու, «Հանրապետություն» կուսակցության նախագահ Արամ Զավենի Սարգսյանը:
Արամ Սարգսյանը շեշտում է, որ «Արցախը ծախելու» թեման արծարծվում է դեռեւս 90-ականներից, եւ դա ճիշտ երեւույթ չէ. «Այս ամենից իսկապես նավթալինի հոտ է գալիս»:
Արամ Սարգսյանը կասկած չունի, որ որեւէ իշխանություն, առավել եւս՝ Նիկոլ Փաշինյանինը, որեւէ պարագայում ծախելու կամ առնելու միտում չունի. «Փաշինյանը փողի մարդ չէ, նա կաշառք չի վերցնում, նա Արցախը ծախի, որ ի՞նչ անի: Արցախի հարցում միասնական պետք է լինել»:
Մեր զրուցակիցը նաեւ նշեց՝ վախենում է այն փաստից, որ Արցախի հարցում Նիկոլ Փաշինյանն ավելի շուտ որեւէ լուծման չի գնա, քան կգնա այնպիսի լուծման, որից դժգոհ կլինի ժողովուրդը. «Կա Մինսկի խմբի օրակարգ, եւ բանակցություններում հեծանիվ հորինել հնարավոր չէ: Միջազգային օրենքներին համահունչ պետք է շարժվել՝ գնալ այնպիսի փաթեթով, որում ներառված է Արցախի ժողովրդի կամարտահայտությունը: Եթե դա կա, կարելի է գնալ բանակցությունների»:
https://www.facebook.com/aravot.am/videos/2223200121232507/
Լուիզա ՍՈՒՔԻԱՍՅԱՆ
