Էներգետիկ ենթակառուցվածքների և բնական պաշարների նախարարի պաշտոնակատար Գարեգին Բաղրամյանը այսօր կառավարության նիստից հետո լրագրողներին ասաց, որ Սանկտ Պետերբուրգում ԵՏՄ խորհրդի նիստի քննարկմանը հայկական կողմը հիմնավորումներով տեղեկանք է ներկայացրել: Նիստի օրակարգում ընդգրկված է նաև Հայաստանին մատակարարվող գազի գնի հարցի քննարկումը:
«Տեղեկանքը ներկայացված է, թե ինչ պետք է բանակցեն, այդ հարցը նախատեսված է օրակարգում»,- ասաց Գարեգին Բաղրամյանը: Իսկ եթե մինչև տարեվերջ բանակցությունները չավարտվեն, գազի գնի հարցով հաջորդ տարի սպասվում է այն, ինչ այսօր ունենք: Ըստ Գ. Բաղրամյանի՝ երբ կլինեն ներմուծման նոր սակագները, կուսումնասիրվեն նաև ներքին գնագոյացման խնդիրները: Նրա կարծիքով՝ «ներքին գնագոյացման ժամանակ կան խնդիրներ, տեղ կա նվազեցնելու»:
Նախարարի պաշտոնակատարը չմանրամասնեց, թե հայկական կողմը ինչ հիմնավորումներ է ներկայացրել ՌԴ: «Որ հիմա բացեմ, կարող է բանակցությունների վրա ազդեցություն ունենալ»,- պատճառաբանեց նա:
Հարցին՝ որոշ մասնագետներ պնդում են, որ ներքին սպառողի համար գազի գինը կարող է իջեցվել մինչև 30 տոկոսով, Գարեգին Բաղրամյանը պատասխանեց. «Երբ հայտարարում են 30 տոկոսով՝ առանց իմանալու գազի ներմուծման գինը, ես մի քիչ ոչ պրոֆեսիոնալ եմ համարում: Երբ կունենանք ներմուծման գին, ըստ այդմ արդեն կարող ենք կողմնորոշվել նաև ներքին սպառողի համար: Բանակցությունների արդյունքում պարզ կլինի՝ ռուսական կողմը պատրաստակա՞մ է իջեցնել գազի գինը, թե՞ դա միայն հայկական կողմի ցանկությունն է»:
Նելլի ԲԱԲԱՅԱՆ
