«Ինչո՞վ եք զբաղված, պետություն է սա, բամբասանքի երեկո չի». Արտակ Զաքարյան

ՀՀԿ-ի իշխանության կարեւորագույն ձեռքբերումը ԱԺ արտաքին հարաբերությունների հանձնաժողովի նախկին նախագահ, պաշտպանության նախկին փոխնախարար Արտակ Զաքարյանը համարում է ղարաբաղյան հարցում «ստատուս-քվոյի» պահպանությունը եւ բոլոր տեսակի բարդություններից դուրս գալ: Այս մասին այսօր Արտակ Զաքարյանը հայտարարեց «Հայելի» մամուլի ակումբում, լրագրողների հետ զրույցում: Առաջիկա խորհրդարանական ընտրություններում, հիշեցնենք, Արտակ Զաքարյանը զբաղեցնում է ՀՀԿ նախընտրական ցուցակի 13-րդ հորիզոնականը:

ՀՀԿ-ի ձախողումը, ըստ Արտակ Զաքարյանի, եղել է կոռուպցիայի դեմ ձեռնարկված պայքարի ոչ արդյունավետությունը: Արտակ Զաքարյանն ասում է՝ ՀՀԿ-ական իշխանությունը շեշտը դրել էր երկրի անվտանգության խնդիրների եւ տնտեսության որոշ ճյուղերի զարգացման վրա, բայց հանրության հետ կապը թուլացրել են, սոցիալական արդարության խնդիրներին էլ բավարար ուշադրություն չեն դարձրել: «Մենք վստահ էինք, որ ամուր պետություն էինք կառուցում, ինստիտուցիոնալ հիմքերն ամուր էին եւ դա երկարաժամկետի համար հնարավորություն էր տալիս կայուն զարգացման ծրագրեր մշակել, բայց ներսում`քաղաքացու, քաղաքացիների սոցիալական խնդիրներին չկարողացանք բավարար ուշադրություն դարձնել: Մարդիկ ընկան պոպուլիզմի ետեւից, սկսեցին իրենց ավելի ականջահաճո հայտարարություններ փնտրել»,- ասաց բանախոսը` հավելելով, որ դրա արդյունքում եղավ այն, ինչ եղավ: «Բայց բնավ էլ չի նշանակում, որ այս կառավարությունը եկել է այդ մարդկանց սոցիալական խնդիրները լուծելու: Լուծելու է այնքան, որքան մենք ենք լուծել, քանի որ սա է առկա ռեսուրսների հնարավորությունը»,- շարունակեց Արտակ Զաքարյանը:

Լրագրողներից մեկը նկատեց`դեկտեմբերի 7-ին կորոշվի երկրորդ նախագահի կալանավորել-չկալանավորելու հարցը. շատերն այն կարծիքին են, որ Ռոբերտ Քոչարյանին կկալանավորեն մինչ ընտրությունները`դիվիդենտներ շահելու համար, իսկ հետընտրական շրջանում բաց կթողնեն նրան:

«Սա կոչվում է թայֆաբազություն, խաբեություն: Եթե իրավական դաշտը թույլ է տալիս անել մի գործողություն, որը բխում է օրենքի տառը պահպանելուց, ուրեմն պետք է անել այդ գործողությունը: Եթե իրավական համակարգը պայքարում է համապատասխան հիմքեր հայթայթելու համար, ուրեմն, անում է անօրինական գործողություն»,- արձագանքեց Արտակ Զաքարյանը` հավելելով, որ հիմա հասկանում է, թե ինչո՞ւ մենք երկար տարիներ պետություն ու պետականություն չենք ունեցել. «Փողոցի, խոհանոցի մակարդակի են հարցերը լուծվել: Ինչո՞վ եք զբաղված, պետություն է սա, բամբասանքի երեկո չի»:

Գործող իշխանության`կոռուպցիոն բացահայտումների մասին էլ բանախոսն ասաց` գոյություն ունի իրավական դաշտ եւ իրավական դաշտի խնդիրները պետք է այդ դաշտում լուծվեն: «Ես դեմ եմ եւ չեմ ընդունում, որ քաղաքական գործիչն ամեն տեղ իր քիթը խոթում է եւ փորձում մանիպուլացնել հանրային կարծիքը: Մենք, որքան մեր ժողովրդին խաբենք`սեփական շահերի համար, ամենավատ եւ ամենաստոր արարքն է»,- ասաց նա`հավելելով, որ պետությունն այդպիսով ոչնչի չի հասնի:

Արտակ Զաքարյանը կարծում է, որ հաջորդ խորհրդարանը չի արտահայտելու երկրի իրական քաղաքական դաշտը: Ավելին, նա կարծում է, որ արտահերթ խորհրդարանական ընտրություններից հետո Հայաստանում դիկտատուրա է հաստատվելու: Արտակ Զաքարյանը ՀՀԿ-ի համար արտախորհրդարանական հարթակը գործունեության բավարար դաշտ չի համարում, քանի որ արտախորհրդարանական դաշտը հնարավորություն չի տալիս որոշումների կայացման վրա ազդեցություն ունենալ: Ուստի, իրենք ձգտելու են լինել խորհրդարանում: ՀՀԿ-ի`ԱԺ-ում լինելուց, ըստ նրա, շահելու է պետությունն ու հասարակությունը, քանի որ ստիպելու են իշխանությանն աշխատել, իրենցից «պրծնելու համար» էլ իշխանությունը ստիպված է լինելու աշխատել:

Նելլի ԳՐԻԳՈՐՅԱՆ