ՀՀ վարչապետի ժամանակավոր պաշտոնակատար, «Իմ քայլը» դաշինքի առաջնորդ Նիկոլ Փաշինյանն այսօր լրագրողների հետ զրույցում անդրադարձավ ՀՀԿ պատգամավորի թեկնածու, ԱԱԾ նախկին ղեկավար Դավիթ Շահնազարյանի այսօրվա հայտարարությանը, որ իրեն ԱԱԾ հրավիրելը քաղաքական հետապնդում է։ «Թող նա ԱԱԾ-ին ներկայացնի այն դավադրությունը, որն, իր պնդմամբ, գոյություն ունի։ Նա ասում է, որ հեղափոխությանն օգնել են ուժեր, որպեսզի գործի «իշխանություն` Արցախի դիմաց» բանաձեւը։ Ստացվում է, որ նա մեզ մեղադրում է ինչ-ինչ ուժերի հետ Արցախի դեմ դավադրություն կազմակերպելու համար։ ԱԱԾ-ն էլ պետք է պարզի ճիշտ է դա, թե ոչ, հայտնաբերի դավադիրներին»,-նշեց Նիկոլ Փաշինյանը։
Նա ընդգծեց` Դավիթ Շահնազարյանը քանիցս հայտարարություններ է անում, բայց հրաժարվում է գնալ ԱԱԾ ու իր փաստերը ներկայացնել առ այն, որ գործող իշխանությունն Արցախի դեմ դավադրություն են կազմակերպում. «Մարդիկ պետք է իմանան` դա դավադրություն է, թե ստախոսություն»: Փաշինյանը տեղեկացրեց` լուրջ վարկած ունի, որ իրեն Արցախը հանձնելու մտադրություն վերագրողներն օտարերկրյա գործակալներ են եւ դավադիր պատերազմ հրահրողներ։
«Դա պետական դավաճանության մեղադրանք է։ Եթե փաստեր չեն ներկայացվում, ուրեմն շառլատանություն է»,-համոզմունք հայտնեց Փաշինյանը։
https://www.facebook.com/aravot.am/videos/2197114560509356/
Լուիզա ՍՈւՔԻԱՍՅԱՆ
