Հավաքական անվտանգության պայմանագրի կազմակերպության (ՀԱՊԿ) երկրների ղեկավարների գագաթաժողովը, որը նախատեսված էր դեկտեմբերի 6-ին, չեղարկվել է՝ հաշվի առնելով ընտրությունների պատրաստվող Հայաստանի համապատասխան խնդրանքը: Այդ մասին լրագրողներին հայտնել է Ռուսաստանի նախագահի օգնական Յուրի Ուշակովը:
«Հաշվի առնելով, մասնավորապես, հայկական կողմի խնդրանքը, որը, պատճառաբանելով նախընտրական քարոզարշավը, որն ավարտվում է դեկտեմբերի 9-ի ընտրություններով, որոշեցինք ՀԱՊԿ (գագաթաժողովի-խմբ.) նիստը չանցկացնել (դեկտեմբերի 6-ին-խմբ.)»,- նշել է նա:
Կրեմլի ներկայացուցչի խոսքով՝ այդպիսով ՀԱՊԿ գլխավոր քարտուղարի ժամանակավոր պաշտոնակատար մնում է Վալերի Սեմերիկովը: Խոսելով նոր գլխավոր քարտուղարի թեկնածության մասին՝ նա նշել է, որ «կան մի քանի տարբերակներ»:
Ուշակովը հայտարարել է նաև, որ մինչև տարեվերջ հազիվ թե անցկացվի ՀԱՊԿ նոր գագաթաժողով:
Պատրաստեց՝ Վիկտորյա ԱՆԴՐԵԱՍՅԱՆԸ
