ՀՀ վարչապետի ժամանակավոր պաշտոնակատար, «Իմ քայլը» դաշինքի առաջնորդ Նիկոլ Փաշինյանը ՀՀԿ-ական պատգամավոր, բնապահպանության նախկին նախարար Արամ Հարությունյանի հանդեպ իրավական գործընթացին այսօր նախընտրական հավաքում այսպիսի բնորոշում տվեց՝ «ՀՀ 3-րդ հանրապետության պատմության ամենախոշոր կոռուպցիոն գործ»:
Հիշեցնենք, որ ՀՀ գլխավոր դատախազությունը կաշառքի հաղորդման հիման վրա դիմել էր ԱԺ-ին՝ պատգամավորի հանդեպ քրեական հետապնդում հարուցելու համար, սակայն խորհրդարանում այսօր քվորում չապահովվեց, հարցը չքննարկվեց:
Անդրադառնալով այդ փաստին՝ Փաշինյանն ասաց. «Բա ի՞նչ էիք մտածում, բա հո մարդիկ անիմաստ չէի՞ն գալիս գործի, գնում…14 միլիոն…բայց ԱԺ-ում քվորում չկա, որ հարցը լուծվեր: Դրա համար մենք այդ ԱԺ-ն ցրեցինք»:
Փաշինյանի բնորոշմամբ՝ դեկտեմբերի իննի ԱԺ ընտրություններից հետո, երբ նոր խորհրդարան կընտրվի, Արամ Հարությունյանը կկորցնի պատգամավորական անձեռնմխելիությունը, իսկ նրա հանդեպ հարուցված քրեական գործի ընթացքը կշարունակվի բնական հունով:
«14 միլիոն դոլար, այն էլ՝ այդ մի գործով: Իսկ նայեք մեր ճանապարհների, դպրոցների, զինվորների վիճակին…»,-նշեց վարչապետի պաշտոնակատարը:
Լուիզա ՍՈՒՔԻԱՍՅԱՆ
