Նախընտրական հերթական հավաքում այսօր ՀՀ վարչապետի ժամանակավոր պաշտոնակատար, «Իմ քայլը» դաշինքի առաջնորդ Նիկոլ Փաշինյանն անդրադարձավ ՀՀԿ փոխնախագահ Արմեն Աշոտյանի այն հայտարարությանը, որ նա պատրաստվում է դատի տալ ՀՀ առաջին փոխվարչապետի պաշտոնակատար Արարատ Միրզոյանին՝ ՀՀԿ-ին «հանցագործների բանդա» կոչելու համար: «Հեսա կտեսնեք՝ ո՞վ ում դատի կտա: Սերմացու գողացող բոլոր մկներին բերելու ենք դատարան՝ հատ-հատ»,-նշեց Նիկոլ Փաշինյանը:
Ապա շեշտեց. «Եթե ոմանց թվում է, թե այդ մկները դատարաններում իրենց պես «սերմացու գողացողներ» ունեն, ապա կառավարությունն ունի լծակներ՝ դատական համակարգում եւս հեղափոխություն անելու: Այդ համակարգում մեծ թիվ են կազմում կոռումպացված, թալանչի դատավորները, եւ նրանց էլ հատ-հատ ենթարկելու ենք պատասխանատվության»:
Ըստ Փաշինյանի՝ այդ դատավորները երկար տարիներ ապօրինի կերպով մարդկանց «լցրել» են բանտերը. «Մարտի մեկի գործով ՄԻԵԴ վճիռներ կան. բա մարսելո՞ւ են իրենց արածն այդ դատավորները»:
Լուիզա ՍՈՒՔԻԱՍՅԱՆ
