«Քաղաքացու իրավունքների պաշտպան» ՀԿ-ն կոչ է անում չգնալ ընտրական տեղամասեր եւ չմասնակցել քվեարկությանը

Հայտարարություն

Փաստելով, որ 2018թ դեկտեմբերի 9-ին նշանակված ՀՀ ԱԺ ընտրությունները ընթանում են՝

1.Կեղծիքներով ընդունված սահմանադրության առկայությամբ և հիմքով,

2.Կեղծիքներով ընտրված ԱԺ-ի կողմից ընդունված ընտրական օրենսգրքի հիմքով,

3.Վարկաբեկված Կենտրոնական ընտրական հանձնաժողովի ղեկավարման ներքո:

Ելնելով այն իրողությունից, որ 2018թ դեկտեմբերի 9-ին նշանակված ԱԺ ընտրություններում քաղաքացու վստահությունն ակնկալող թեկնածուները չեն բարձրացնում քաղաքացու իրավունքների պաշտպանության հարցերը, չեն կարեւորում քաղաքացու ազատությունները եւ, ընդհանրապես չեն անդրադառնում քաղաքական առաջնային խնդիրներին՝ ազատությանը, հավասարությանը, եղբայրությանը, ինչպես նաեւ` ռուսական զորքերը դուրս բերելու, ինքնիշխանությունը վերականգնելու հարցերին, ինչպես նաև անտեսում են առաջնային կարևորության խնդիրները, այն է՝

1.Գործող սահմանադրության կասեցում և նոր սահմանադրության ընդունում,

2.Ընտրական նոր օրենսգրքի ընդունում,

3.Նոր Կենտրոնական ընտրական հանձնաժողովի կազմավորում,

4.Հայաստանի ԵՏՄ-ի կազմում մնալու նպատակահարմարություն,

5.Լեռնային Ղարաբաղի կարգավիճակի հստակեցում,

6.Արծվաշենի հարցի միջազգայնացում,

7.Լեռնային Ղարաբաղում ռոումինգի վերացում:

Հաշվի առնելով այդ ամենը, «Քաղաքացու իրավունքների պաշտպան» ՀԿ-ն կոչ է անում ՀՀ քաղաքացիներին չմասնակցել 2018թ դեկտեմբերի 9-ի ընտրություններին, չգնալ ընտրական տեղամասեր եւ չմասնակցել քվեարկությանը:

«Քաղաքացու իրավունքների պաշտպան» ՀԿ նախագահ՝  Կարեն  Հեքիմյան (լուսանկարում)