ԱԺ պատգամավոր Արամ Հարությունյանին անձեռնմխելիությունից զրկելու գործընթացում Հայ Յեղափոխական Դաշնակցության ԱԺ խմբակցության ղեկավար Արմեն Ռուստամյանը նախընտրական ձեռագիր է տեսնում: Այսօր այս մասին ասաց ՀՅԴ նախընտրական ցուցակը գլխավորող Ռուստամյանը Արմավիր քաղաքում նախընտրական քարոզարշավի մեկնարկից առաջ՝ լրագրողների հետ զրույցում:
ՀՀ գլխավոր դատախազ Արթուր Դավթյանը միջնորդություններ է ներկայացրել ՀՀ Ազգային ժողովին, ի դեմս ՀՀ ԱԺ նախագահի՝ տալու համաձայնություն ՀՀ Ազգային ժողովի պատգամավոր Արամ Հարությունյանի նկատմամբ քրեական հետապնդում հարուցելուն, ինչպես նաև նրա նկատմամբ կալանավորումը, որպես խափանման միջոց կիրառելուն: Հարությունյանը մեղադրվում է 14 մլն դոլար կաշառք ստանալու համար, այն ժամանակ, երբ բնապահպանության նախարար է եղել: Վաղը պետք է ԱԺ արտահերթ նիստ գումարվի՝ Հարությունյանի հարցը քննարկելու համար:
Ռուստամյանն ասաց, որ միտում է տեսնում այս նախընտրական շրջանում նման գործընթաց սկսելը. «Այսինքն՝ որ սա դառնում է՝ պետք է ծառայեցվի իշխող ուժին: Այսքան ժամանակ նամակին սպասեցին, մի քանի օր չէի՞ն կարողանում սպասել: Մի քանի օրից ընդհանրապես պատգամավոր չէր լինելու դադարեցնելու է ու վերջանալու էր»: Ռուստամյանն ասաց, որ առանց այն էլ կարճատեւ քարոզարշավից թեկնածուներին իզուր գործից կտրել ու տանել ԱԺ՝ ճիշտ չէ:
«Փաշինյանն անընդհատ հայտարարում էր՝ կա մեկը, որ սպասում են նամակին, էսքան կարող էին նամակին սպասել, բայց մի քանի օր սպասել մյուս գործընկերներին… կտրել թողնել քարոզչությունը: Գրաֆիկ է կազմված: Դուրս է գալիս ձախողել քարոզարշավը»: Ռուստամյանը հիշեցրեց, միասին համաձայնվել էին այս օրերին նիստ չգումարել, եւ «Ելք»-ի ղեկավարի ստորագրությունն էլ կար:
Ռուստամյանը վստահեցրեց, ՀՅԴ խմբակցության պատգամավորներն, այդուհանդերձ, կմասնակցեն այդ նիստին:
Մանրամասները՝ տեսանյութում
Aravot.am-ի հարցին՝ արդյոք իրավապահ մարմիններն են ծառայություն մատուցում, իշխանությանը, Ռուստամյանը պատասխանեց. «Հակառակն եմ տեսնում»:
Նելլի ԲԱԲԱՅԱՆ
Դուք չեք կարձում ,որ կարող է գնալ երկրից ունենալով անձեռնամխելիություն և դա խաղեր չի այլ վտանգը կանխելու միջոց