ԵԱՀԿ ԺՀՄԻԳ միջանկյալ զեկույցում մտահոգություն կա պետական ռեսուրսների հնարավոր չարաշահման, քվեների գնման, ինչպես նաև ընտրողների վրա ճնշում գործադրելու վերաբերյալ:«Առավոտը» Երևանի մամուլի ակումբի (ԵՄԱ) նախագահ Բորիս Նավասարդյանից հետաքրքրվեց՝ դա հակադրության մեջ չի՞ մտնում սիրո և հանդուրժողականության մթնոլորտի հետ: «Բնականաբար, մտնում է այդ կարգախոսի հետ հակասության մեջ: Եվ, փաստորեն, այդ սիրո և համերաշխության տրամադրությունը հիմնականում հասարակության այն մասի համար է, որը պաշտպանում է հեղափոխությունը: Այն մասի դեպքում, որը չի պաշտպանում այդ զարգացումները և փոփոխությունները, որ տեղի ունեցան ՀՀ-ում, դժվար թե մթնոլորտն ընկալվի որպես սիրո և հանդուրժողականության: Տեսնում ենք, որ բառապաշարը, որն օգտագործվում է նոր իշխանությունների և իշխող քաղաքական ուժի նկատմամբ, հեռու է սիրո և համերաշխության բառապաշարից, և ցավոք, տեսնում ենք նաև պատասխան հակառակ կողմից: Հեղափոխության, իշխանության դեմ քարոզչություն իրականացնողները և «Իմ քայլը» ու նրա առաջնորդները նույն լեզվով են պատասխանում»,- պատասխանեց Բորիս Նավասարդյանը:
ՏԱԹԵՎ ՀԱՐՈՒԹՅՈՒՆՅԱՆ
«Առավոտ» օրաթերթ,
01.12.2018
