Մարդկության դարավոր պատմության ընթացքում տարբեր ժողովուրդներ իրենց պաշտոնյաներին, ղեկավարներին իրենց հարիր անվանումներ են տվել: Այսօր մենք էլ մեր ժողովրդին պարզ ու հասկանալի պաշտոնյաներին անվանումներ ենք տալիս: Բոլոր ժամանակներում պաշտոնյան պարտականություն է ունեցել՝ այդ պաշտոնին համապատասխան: Ինչպես հնում, այնպես էլ ներկայումս, եթե պաշտոնյան չի կարողանում կատարել իր պաշտոնին հարիր պարտականությունները, նրան այս կամ այն ձեւով հեռացնում են պաշտոնից, իսկ եթե նա իր ղեկավարած պաշտոնին ենթակա վնասներ է պատճառում, նրան համապատասխան պատժի են ենթարկում: Այսօր մեր երկրում բազմաթիվ պաշտոններ-պաշտոնատերեր գոյություն ունեն: Նրանցից շատերը բարեխղճորեն կատարում են իրենց պարտականությունները՝ այն չհամարելով սեփականություն: Վերջին տարիներին պատմամշակութային եզակի հնավայր «Կարմիր բլուրի» հնություններից շատերը անհայտացան: Այն զրկելով որպես հայ ժողովրդի հնադարյան ներկայացնող հնավայր:
Այսպես, մ.թ.ա. 7-րդ դարում Երեւանի հարավ-արեւմտյան տարածքի Հրազդան գետի ձախ ափին բլուրի վրա կառուցվեց ամրոց: Բնակիչները լայնածավալ հարթ տարածության վրա զբաղվում էին դաշտավարությամբ, անասնապահությամբ, խաղողագործությամբ եւ արհեստներով: Խաղողից ստացած գինու քանակը հասնում էր 16 հազ. դեկալիտրի, որը լցվում էր հսկա տակառների մեջ: Դրանք մառանում շարված էին երկշարք, իսկ վզամասում սեպագիր գրված էր տարողությունը: Կար պանրի մեծածավալ արտադրամաս, նույնպես՝ ձեթ ստանալու համար: Մինչ անկախության ձեռքբերումը կառավարությունը բավականին ուշադրություն էր դարձնում այդ եզակի պատմամշակութային հնավայրին: Պատրաստված էր զբոսաշրջիկների, այցելուների համար շատ հարմար երթուղի: Սակայն անկախության այս վերջին տարիներին այն մատնվեց անուշադրության, իսկ եղած հնություններից շատ շատերը պարզապես գողացվեց, վաճառվեց: «Կարմիր բլուրի» եզակի պատմամշակութային հնավայրի 16000 դեկալիտր գինու կարասները վաճառվեցին: Միայն մեկը թողեցին Էրեբունու թանգարանում: Վաճառվեցին նաեւ չափազանց գեղեցիկ երկու-երեք լիտրանոց ջրամանները եւ այլ արժեքավոր հնություններ: Կարծում ենք՝ ներկա իշխանությունները միջոցներ կձեռնարկեն կարասները հետ բերելու, իրենց մառանում տեղադրելու խնդրում: «Կարմիր բլուրը» ոչ մեկի սեփականությունը չէր, մեր ժողովրդի դարավոր մշակույթն է:
ՍԵՐԳԵՅ ԱՎԱԳՅԱՆ
«Առավոտ» օրաթերթ,
01.12.2018
