Առաջիկա հինգ տարում ՀՀ ԶՈՒ կարիքների համար կծախսվի հավելյալ 2,5 միլիարդ դոլար, եւ այդ գումարը վճարելու են հայտնի կոռուպցիոներները: Այս մասին այսօր նախընտրական հավաքի ժամանակ հայտարարեց «Իմ քայլը» դաշինքի առաջնորդ, ՀՀ վարչապետի ժամանակավոր պաշտոնակատար Նիկոլ Փաշինյանը: «Եթե նրանք դա կանեն կամավոր, մենք հաշվի կառնենք դա: Սա չի նշանակում, թե նշյալը թալանված գումարի ողջ չափն է»,-նկատեց Նիկոլ Փաշինյանը:
Նա նշեց, որ անցումային արդարադատության մարմինների ստեղծման շրջանակում առաջիկայում նոր ԱԺ-ի կողմից որոշակի մեխանիզմների մշակման անհրաժեշտություն կլինի. «Օրինակ, որեւէ մեկը ներկայանում է իրավապահներին, կամ հայտարարում է, որ ինքը այսքան կամ այնքան չարաշահում է թույլ տվել ու գողացել է այսքան գումար, պատրաստ է վերադարձնել: Ի՞նչ անել նման դեպքերում: Այս հարցն առաջիկայում ԱԺ-ում պետք է քննարկել, հանրությունն էլ պետք է մասնակցի»:
Փաշինյանը վստահեցրեց, որ ժողովրդից գողացվածը մինչեւ վերջ պետք է վերադարձվի եւ ծառայեցվի ՀՀ անվտանգության կարիքներին եւ հետագա զարգացմանը. «Բացառվում է, որ որեւէ կոռուպցիոների հետ որեւէ բան պայմանավորվենք ժողովրդի թիկունքում»:
Լուիզա ՍՈՒՔԻԱՍՅԱՆ
