Դպրոցների, մանկապարտեզների, համատիրությունների եւ այլ հասարակական նշանակության օբյեկտների շենքերում տեղակայված ընտրատեղամասեր հաշմանդամություն ունեցող անձանց համար հարմարեցված չեն: Ամեն ընտրությունից առաջ հաշմանդամություն ունեցող անձանց իրավունքների պաշտպանությամբ զբաղվող ՀԿ-ներն այս խնդիրն արծարծում են, սակայն այն այդպես էլ չի լուծվում: Ընտրությունների օրերին տեղաշարժման խնդիրներ ունեցող շատ քաղաքացիներ մնում են տանը փակված՝ չնայած Ընտրական օրենսգրքի պահանջով ընտրատեղամասերը պետք է հասանելի լինեն:
Բացի այդ, Հայաստանը 8 տարի առաջ է նման պարտավորություն ստանձնել՝ վավերացնելով հաշմանդամություն ունեցող մարդկանց իրավունքների պաշտպանության ՄԱԿ–ի կոնվենցիան: Դրանով մեր պետությունը պարտավորվել է հաշմանդամություն ունեցող անձանց սոցիալապես ներառել հասարակություն, ստեղծել արժանապատիվ կյանք վարելու պայմաններ ու հնարավորություններ:
«Ունիսոն» հասարակական կազմակերպության ղեկավար Արմեն Ալավերդյանն այսօր «Տեսակետ» ակումբում կառավարության պատասխանատուների, Երեւանի իշխանությունների առաջ կրկին բարձրացրեց այդ խնդիրը՝ նշելով, որ մոտ օրերս հանդիպելու են վարչապետի պաշտոնակատար Նիկոլ Փաշինյանին հենց այս հարցերը քննարկելու: Պարոն Ալավերդյանի խոսքով, ընտրական գործընթացներում քաղաքական ուժերն այդքան մեծ ռեսուրսներ են ներգրավում, սակայն քարոզարշավները չեն զուգորդվում սուրդո՝ ժեստերի լեզվով թարգմանություններով, որպեսզի չլսող մարդիկ էլ ծանոթանան նախընտրական ծրագրերին: Ըստ նրա, չտեսնող մարդկանց համար էլ չկան պայմաններ:
Մանրամասները՝ տեսանյութում
«Խոսում ենք համընդհանուր ներառական կրթությունից, բայց երեխաները չունեն հնարավորություն գնալ հանրակրթական դպրոց եւ ստանալ նորմալ կրթություն: Հաշմանդամություն ունեցող աշխատունակ տարիքի մարդկանց 8-9 %-ն է աշխատում, մինչդեռ այդ տոկոսը կարող էր ավելի մեծ լինել եւ այդ մարդիկ ոչ միայն նպաստ չէին ստանա պետությունից, այլեւ հարկեր կվճարեին, հասարակության լիարժեք անդամ կլինեին»:
Արմեն Ալավերդյանի տվյալներով՝ մեր երկրում գրանցված է հաշմանդամություն ունեցող 187 հազար քաղաքացի, սակայն պարոն Ալավերդյանը վստահ է, որ այդ թիվն ավելի մեծ է. «Նրանցից շատերը մնում են տանը փակված, այդ պատճառով իրական թիվը չէ այդ 187 հազարը: Բոլոր հասարակություններում էլ հաշմանդամություն ունեցող մարդիկ կազմում են հասարակության մոտ 15 տոկոսը»:
Պարոն Ալավերդյանը կառավարությունից պահանջում է 100 տոկոսանոց մատչելիություն. «Հոգնել ենք լսելով, որ դպրոցները, մանկապարտեզները սովետական տարիներին են կառուցվել եւ հարմար չէ տեղաշարժման խնդիրներ ունեցող մարդկանց: Բայց դա մեր խնդիրը չէ, թող այնպիսի վայրերում դրանք տեղակայեն, որպեսզի հարմար լինի: Տեխնիկայի դար է, գոյություն ունի էլեկտրոնային քվեարկություն»:
Լուսինե ԲՈՒԴԱՂՅԱՆ
