ԲՀԿ-ի պատգամավորի թեկնածուներն այսօր նախընտրական հանդիպում ունեցան Արմավիրում: Հանդիպման սկզբում արմավիրցի մի կին իր խնդրի լուծման ակնկալիքով մոտեցավ քարոզարշավին մասնակցող կուսակցության առաջնորդ Գագիկ Ծառուկյանին:
«Մի խնդրանք ունեմ, երեք օր է՝ մեքենա եմ ստացել, 170 կիլո ապրանք կա մեջը, ու չեմ կարողանում մաքսազերծել, ֆուռերը կանգնած՝ ինձ ուղարկում են ստեղից էնտեղ»,- բողոքեց կինը: Գագիկ Ծառուկյանն էլ խոստացավ օգնել:
Քաղաքացիները բազմաթիվ նամակներ նրան փոխանցեցին: Իսկ երբ Գագիկ Ծառուկյանը կառատե պարապող երեխաներին գովեց, նրան ուղեկցող մի մարդ միանգամից հորդորեց. «Իյա, մի հատ ծափ տվեք, պարոն Ծառուկյանին»:
Եղան նաեւ քաղաքացիներ, որոնք սելֆիներ արեցին Ծառուկյանի հետ՝ ասելով, թե նրան միայն հեռուստացույցով են տեսնում:
Գագիկ Ծառուկյանն էլ շնորհակալություն հայտնեց ընդունելության համար,
«Հիմնական շփվել եք, աշխատել ենք, դուք գիտեք՝ եթե Ծառուկյանն ասաց՝ հա, ուրեմն էդ հան, հա է: Որեւէ մեկը չի կարող ասի՝ Ծառուկյանը բան խոստացավ ու չարեց: Մեզ միայն հնարավորություն է պետք, ես չեմ ասում՝ կախարդական փայտիկ ունենք»:
Նա ասաց, որ լավ առաջադիմություն ունեցող երիտասարդներին չպետք է ուշադրությունից բաց թողնել, նրանք դեռ չավարտած պետք է աշխատանքի անցնեն, որ չթողնեն արտագաղթեն կամ տաքսի քշեն:
Գագիկ Ծառուկյանն ասաց, որ չպետք է թողնեն, որ երիտասարդները տան խնդրի պատճառով չամուսնանան կամ էլ այդ խնդրի պատճառով լքեն երկիրը, խոստացավ ցածր տոկոսներով վարկեր երիտասարդներին՝ տուն գնելու համար, ցածր տոկոսներով նաեւ գյուղատնտեսական վարկեր:
Արփինե ՍԻՄՈՆՅԱՆ
