Միջազգային օլիմպիական կոմիտեն սառեցրել է Տոկիոյի 2020 թվականի օլիմպիական խաղերում բռնցքամարտի մրցումների անցկացման բոլոր ծրագրերը: Այս մասին տեղեկացնում է ՄՕԿ-ի պաշտոնական կայքը՝ ճշգրտելով, որ որոշումը կայացրել է ՄՕԿ-ի գործկոմը, եւ այն կապված է ԱԻԲԱ-ի նկատմամբ սկսված հետաքննության հետ:
Նոյեմբերի սկզբին ԱԻԲԱ-ի նախագահ ընտրվել էր Գաֆուր Ռահիմովը, որի անունը մտցված է ԱՄՆ-ի ֆիննախի պատժացուցակ: Այն ժամանակ ՄՕԿ-ից ԱԻԲԱ-ին նախազգուշացրել էին, որ դա կարող է բացասական ազդեցություն ունենալ մարզաձեւի օլիմպիական կարգավիճակի վրա:
Բռնցքամարտի համաշխարհային խորհուրդը (WBC) ՄՕԿ-ին բռնցքամարտը օլիմպիական խաղերի ծրագրում պահելու կոչ է արել՝ հիշեցնելով, որ այս մարզաձեւի ներկայացուցիչները օլիմպիական խաղերում հանդես են գալիս արդեն մեկ դարից ավելի:
Նշվում է, որ ՄՕԿ-ում այս հարցի քննարկմանը կարող են վերադառնալ մինչեւ տարեվերջ: Իսկ մինչ այդ, ժամանակավորապես լիովին դադարեցվել են հարաբերությունները ԱԻԲԱ-ի եւ օլիմպիական խաղերի կազմկոմիտեի միջեւ: Բացի դա, կասեցվել են տոմսերի վաճառքը, թեստային մրցումների պլանավորումը, օլիմպիական մրցաշարում բռնցքամարտի ծրագիրը կազմելու աշխատանքները:
Ստեղծվել է նաեւ հատուկ կոմիտե, որը զբաղվելու է ԱԻԲԱ-ի հաշվետվողականությամբ, կազմելու է հնարավոր պատժամիջոցներ կիրառելու առաջարկների ցանկ եւ այն ներկայացնելու է ՄՕԿ-ին:
Աշոտ ՀԱԿՈԲՅԱՆ
