Թեեւ սովոր ենք, որ ձվով ուտեստները նախաճաշին են հարմար, բայց իտալացիների «ֆրիտատան» ժամ-պատարագ չի հարցնում: Այն ուտում են օրվա ցանկացած ժամի, քանի որ շատ հարմար ուտեստ է՝ հեշտ է պատրաստվում, սառնարանում մնացած մթերքները սպառելու հրաշալի միջոց է, հագեցնող է, եւ ի վերջո՝ շատ համեղ է:
Ֆրիտատայի համար կոնկրետ բաղադրատոմս չկա, կա սկզբունք՝ վերցնել այդ պահին ձեռքի տակ եղած մթերքները, խառնել հարած ձվի եւ քերած պանրի հետ ու տապակել: Տապակել կարելի է թե՛ գազի վրա՝ սովորական ձվածեղի նման, թե՛ ջեռոցում՝ ավելի լավ տեսք ստանալու համար: Այնուամենայնիվ գրեմ այն մթերքները եւ չափաքանակները, որոնք օգտագործվել են կոնկրետ ա՛յս ֆրիտատայի համար:
Անհրաժեշտ մթերքները
Սոխ-կես գլուխ
Սխտոր- կես պճեղ
Վիչինա- 250 գրամ
Սունկ-2 հատ
Կարմիր թարմ պղպեղ- 2 հատ
Խաշած կարտոֆիլ- 1 հատ
Ձու- 7 հատ
Պանիր – 100 գրամ
Ձեթ- 4 ճաշի գդալ
Աղ, սեւ պղպեղ, չորացրած կանաչիներ-ըստ ճաշակի
Պատրաստման եղանակը
Բանջարեղենները մաքրեք եւ լվացեք: Ձեթի մեջ տապակեք մանր կտրատած սոխը, ավելացրեք սխտորը: Քիչ անց ավելացրեք նաեւ կտրատած վիչինան: Լավ տապակեք: Ավելացրեք կտրատած սունկն ու թարմ պղպեղը, թողեք մի քիչ էլ տապակվի: Վերջում ավելացրեք խաշած կարտոֆիլը, անջատեք գազը եւ թավան դրեք մի կողմ:
Ինչպես արդեն ասացի՝ ոչ մի կոնկրետ բաղադրիչներ ֆրիտատան չի պահանջում, վիչինան կարող եք փոխարինել որեւէ այլ երշիկով, եփած կամ տապակած հավով, տավարի մսով, կարող եք ընդհանրապես հանել բաղադրատոմսից: Բանջարեղեններն էլ կարող են լինել շատ տարբեր՝ դդմիկ, խաշած գազար, նեխուր (քարավուզ), ծնեբեկ, բրոկոլի, ծաղկակաղամբ եւ այլն: Կարող եք ավելացնել պահածոյացված ոլոռ, եգիպտացորեն, կանաչ լոբի:
Առանձին ամանում հարեք ձվերը, ավելացրեք քերած պանիրը: Կարող եք վերցնել ինչպես որեւէ դեղին, պինդ պանիր, այնպես էլ սուլուգունի, մոցարելա, փափուկ «լոռի»: Ավելացրեք նաեւ համեմունքները: Ջեռոցի տապակի կամ որեւէ հրակայուն գեղեցիկ ամանի հատակին բուսայուղ քսեք: Արդեն մի փոքր սառած տապակած բանջարեղենի վրա ավելացրեք ձվա-պանրային խառնուրդը, արագ խառնեք, որ ձուն նախապես չեփվի բանջարեղենի տաքությունից, լցրեք հրակայուն ամանի մեջ եւ դրեք 10-15 րոպե առաջ 170-180 աստիճանով տաքացված ջեռոցը:
Թողեք լավ եփվի, մոտ 30 րոպե: Հանեք եւ մատուցեք տաք-տաք: Այս ուտեստը նաեւ սառը վիճակում են մատուցում, կամ պահում են սառնարանում եւ հարկ եղած պահին կտրում մի կտոր, տաքացնում միկրոալիքային վառարանով եւ մատուցում:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
