Մայրաքաղաքի բազմաթիվ կանգառներ «գրավել են» անձնական ավտոմեքենաները: Հասարակական տրանսպորտի կայանելու համար անգամ մի փոքր տարածք չեն պահում: Լուսանկարն արվել է Խորենացի փողոցում՝ ոսկու շուկայի հարեւանությամբ:
Կանգառանշանը տեղադրված է, սակայն ուղեւորների ու տրանսպորտի համար նախատեսված ամբողջ տարածքը «զավթել են» այլ ավտոմեքենաներ: Ընդ որում, այստեղ նաեւ մեքենաների կայանելու համար սպիտակ գծանշումներ կան, ու անհասկանալի է՝ կանգա՞ռ է, թե՞ ավտոմեքենաների կայանման վայր:
Հասարակական տրանսպորտային միջոցն այստեղ կայանելու համար խնդիրներ է ունենում. նախ՝ խցանում է առաջացնում, քանի որ հետեւից եկող մեքենաները չեն կարող առաջ անցնել, տեղ չկա, ուստի ստիպված սպասում են մինչեւ ուղեւորները նստեն կամ իջնեն:
Նման իրավիճակ է ամեն օր եւ օրվա գրեթե բոլոր ժամերին Ագաթանգեղոսի, Տիգրան Մեծի ու էլի շատ ու շատ փողոցներում:
Ճանապարհային ոստիկանությունն էլ նկատում է այս իրավիճակը, սակայն երբեք չենք հանդիպել, որ այս կանգառներում կայանած մեքենաների վարորդներին հրահանգեն դուրս գալ կանգառից:Այս ոլորտում կարծես թե իրավիճակ չի փոխվել, հեղափոխություն չի եղել. ուրեմն պատասխանատուները լավ կլինի կա՛մ կանգառները քաղաքացիներին հասանելի հատվածներում տեղադրեն, կա՛մ դրանք «մաքրեն» ավելորդ մեքենաներից:
Լուսնկարը՝ Նելլի Բաբայանի
«Առավոտ»,
29.11.2018
