«Ասել եմ եւ էլի եմ ասում։ ՀԱՊԿ գլխավոր քարտուղարի հարցը շատ փոքր, եւ նույնիսկ ոչ էական հարց է»,-նախընտրական հավաքում այսօր հայտարարեց ՀՀ վարչապետի ժամանակավոր պաշտոնակատար, «Իմ քայլը» դաշինքի առաջնորդ Նիկոլ Փաշինյանը։ Հիշեցնենք, որ ՀԱՊՀ գլխավոր քարտուղարի հարցը երկրորդ անգամ կքննարկվի դեկտեմբերի վեցին։
Փաշինյանը նշեց. «Շատ ավելի կարեւոր են այն հարցերը, որոնք քննարկվում են այս համատեքստում։ Մենք, ըստ էության, ոչ թե վատթարացրել ենք մեր հարաբերությունները որեւէ մեկի հետ, այլ արձանագրել ենք այն վատ վիճակը, որում գտնվում է ՀՀ-ն։ Այն վատ եւ հեղինակազուրկ վիճակը, որը մենք ժառանգել ենք այդ եւ ոչ միայն այդ կառույցում»:
Փաշինյանի բնորոշմամբ, իրենք, ի տարբերություն նախորդ իշխանությունների, մտադիր չեն անուշադրության մատնել ՀՀ անվտանգության կենսական խնդիրները։ Հիշեցնենք, որ փորձագետների եւ քաղաքական գործիչների մի մասը Փաշինյանին մեղադրում են ՀԱՊԿ ԳՔ պաշտոնի նշանակությունը ստորադասելու մեջ։ «Կարեւոր է, որպեսզի ՀԱՊԿ-ում մենք հստակեցնենք մեր պարտավորությունները մեր դաշնակիցների առաջ»,-եզրափակեց Նիկոլ Փաշինյանը։
Լուիզա ՍՈւՔԻԱՍՅԱՆ
