2019-ի հունվարի 1-ից կբարձրացվի որոշ խոցելի խմբերի համար նպաստների չափը: Այսօր այսպիսի որոշում կայացրեց կառավարությունը:
Նախագծով առաջարկվում է բարձրացնել ծերության, հաշմանդամության, կերակրողին կորցնելու դեպքում նպաստների չափերը: Այսպես՝ ներկայացվող նախագծով առաջարկվում է պարտադիր ժամկետային զինվորական ծառայության շարքային կազմի զինծառայողի հաշմանդամության զինվորական կենսաթոշակի չափը երրորդ խմբի հաշմանդամի համար (18 000 դրամ) եւ պարտադիր ժամկետային զինվորական ծառայության շարքային կազմի մահացած (զոհված) զինծառայողի ընտանիքի անդամի կերակրողին կորցնելու դեպքում զինվորական կենսաթոշակի չափը (24000 դրամ), ծերության, հաշմանդամության, կերակրողին կորցնելու դեպքում նպաստների չափերը սահմանել 25 500 դրամ։
Ըստ կառավարության պատասխանատուների՝ 25 500 դրամից պակաս կենսաթոշակ ստացող կենսաթոշակառուի, «Պետական նպաստների մասին» ՀՀ օրենքով սահմանված ծերության, հաշմանդամության, մեկ կերակրողին կորցնելու դեպքում նպաստները 2019 թվականի հունվարի 1-ից կվճարվեն 25 500 դրամի չափով:
Ներկայումս ծերության նպաստի նվազագույն չափը 16 000 դրամ է, հաշմանդամության նպաստի չափերը՝ 1-ին խմբի հաշմանդամի եւ հաշմանդամ երեխայի համար՝ 21 500 դրամ, երկրորդ խմբի հաշմանդամի համար՝ 19 000 դրամ, երրորդ խմբի հաշմանդամի համար՝ 16 000 դրամ:
Կերակրողին կորցնելու դեպքում նպաստի չափը 16000 դրամ է։
Լուսինե ԲՈՒԴԱՂՅԱՆ
