«Չեմ հասկանում ԼՂ իշխանության ներկայացուցիչների ակտիվությունը: Այդ ինչո՞ւ են մեկնաբանություններ անում եւ փորձում խառնվել եւ ներկայություն ունենալ ՀՀ խորհրդարանական ընտրությունների քարոզարշավի ընթացքում»,-նախընտրական հավաքում այսօր հայտարարեց ՀՀ վարչապետի ժամանակավոր պաշտոնակատար, «Իմ քայլը» դաշինքի առաջնորդ Նիկոլ Փաշինյանը: Նա տեղեկացրեց՝ նշյալի առնչությամբ իր մոտ հարցեր են առաջացել, որոնք կքննարկի Արցախի նախագահ Բակո Սահակյանի հետ:
«Իսկ մինչ այդ պարոն Սահակյանին հորդորում եմ կարգի հրավիրել իր կառավարության աշխատակիցներին եւ նրանց ուղարկել իրենց աշխատանքով զբաղվելու: Չհասկացա՞… ԼՂ նախագահի մամուլի խոսնակն օր ու մեջ իմ ասածների վերաբերյալ մեկնաբանությո՞ւն է տալիս, այ քեզ բա՜ն… բա պատկերացնո՞ւմ եք՝ իմ խոսնակը Ղարաբաղի հայտնի եւ անհայտ իրադարձությունների վերաբերյալ մեկնաբանություններ տա: Հասկանո՞ւմ եք դրա հետեւանքը եւ արդյունքը»:
Ապա Փաշինյանը դիմեց Արցախի պաշտոնյաներիին. «Սթափվե՜ք հարգելիներս, եւ զբաղվեք ձեր աշխատանքով: Այն, ինչ տեղի է ունեցել, ձեզ հետ անպայման կքննարկեմ, բայց ընտրություններից հետո»:
Լուիզա ՍՈՒՔԻԱՍՅԱՆ
