Այսօր ՀՀԿ թեկնածու, ԱԺ փոխնախագահ Արփինե Հովհաննիսյանը քարոզարշավն իրականացնում է Լոռու մարզում: Նա այդ ընտրատարածքում ՀՀԿ-ի ռեյտինգային թեկնածուն է նաեւ:
Ուշագրավ է, որ Արփինե Հովհաննիսյանը այսօր ֆեյսբուքյան իր էջում լոռեցիներին կոչ է արել տարածքային ցուցակում քվեարկել ոչ թե իր, այլ՝ Էդուարդ Շարմազանովի օգտին, այն դեպքում, երբ այդ ընտրատարածքում ՀՀԿ-ի կողմից առաջադրվել է նաեւ ՀՀԿ խմբակցության ղեկավար Վահրամ Բաղդասարյանը, ինչպես նաեւ՝ Սամվել Գաբրիելյանը, Անահիտ Խանզադյանը, Արմենուհի Հովակիմյանը, Արսեն Ղուկասյանը, Արթուր Նալբանդյանը:
Արփինե Հովհաննիսյանն իր կոչն այսպես է բացատրում. «Հարգելի հայրենակիցներ, ինչպես գիտեք դեկտեմբերի 9-ին կայանալիք արտահերթ խորհրդարանական ընտրություններին ռեյտինգային ընտրակարգով որպես ԱԺ պատգամավորի թեկնածու` առաջադրվել եմ թիվ 9 (Լոռու մարզ) ընտրատարածքում: Միևնույն ժամանակ, ՀՀԿ համամասնական ցուցակի 2-րդ համարն եմ:
Կլինեմ անկեղծ: Մենք անցկացնելու ենք առավելագույնս ակտիվ քարոզարշավ, և ես շատ կցանկանայի այցելել Լոռու մարզի բոլոր բնակավայրերը, շփվել բոլորի հետ` ներկայացնելով մեր ծրագրերն ու առաջարկները Բայցևայնպես, համամասնական ցուցակի 2-րդ համարի տրամաբանությունը թույլ չի տալիս կենտրոնանալ ռեյտինգային ընտրակարգի էությունից բխող քարոզարշավի վրա: Անշուշտ, հնարավորություններիս առավելագույնի չափով կանեմ ձեր առջև ներկայանալու և ձեզ ներկայացնելու մեր ծրագրերն ու առաջարկները, բայց խնդրում եմ ստեղծված իրավիճակին մոտենալ ըմբռնումով: Այսօր առաջին օրն է, որ ես հնարավորություն ունեմ մեկնել Լոռի։ Ու կրկին պետք է վերադառնամ Երեւան:
Կոչ եմ անում և խնդրում եմ Լոռու մարզի ընտրողներին քվեարկել ՀՀԿ համամասնական ցուցակի օգտին, իսկ ռեյտինգային ընտրակարգով` ոչ թե իմ, այլ Էդուարդ Շարմազանովի օգտին: Որպես ռեյտինգային ընտրակարգով առաջադրված պատգամավորի թեկնածու եւ իսկական լոռեցի` իմ գործընկեր Էդուարդ Շարմազանովը շատ ավելի լավ է տիրապետում մարզի խնդիրներին և դրանց լուծման մեխանիզմներին, քան որևէ այլ թեկնածու»:
Հռիփսիմե ՋԵԲԵՋՅԱՆ
