2019թ.-ից վարկային շահավետ միջոցներ կտրամադրվեն ՀՀ բոլոր մարզերի այն բնակիչների համար, որոնք ցանկություն կհայտնեն սկսել ծղոտից ստացվող խտացված վառելանյութի արտադրություն: Այս մասին այսօր Սյունիքի մարզում նախընտրական հավաքի ժամանակ հայտարարեց «Իմ քայլը» դաշինքի առաջնորդ, ՀՀ վարչապետի ժամանակավոր պաշտոնակատար Նիկոլ Փաշինյանը:
«Ծղոտից ստացվող վառելանյութը շատ ավելի կալորիական է, քան փայտը: Խոսել եմ ՀՀ կենտրոնական բանկի հետ. շատ էժան վարկեր կտրամադրենք: Կոչ եմ անում մտածել այդ ուղղությամբ»,-նշեց Նիկոլ Փաշինյանը:
Նրա խոսքով՝ նշյալ վառելիքի մեկ խ/մ-ն վաճառվում է 70 000 դրամով. «Դա համարժեք է մոտ չորս խ/մ փայտին: Նրանք, ովքեր այսօր վառելափայտի վաճառքով են զբաղված եւ այդ գործն են սիրում, կարող են շարունակել իրենց գործն անել, բայց առանց անտառներին վնասելու: Մենք նրանց կֆինանսավորենք: Կարծում եմ՝ շատ ձեռնտու առաջարկ է»:
Լուիզա ՍՈՒՔԻԱՍՅԱՆ
