«Տեսանյութը տեղադրվել է Իսպանիայից, կոտրվել է հայտնի մի յութուբյան էջ և այնտեղ էլ տեղադրվել է: Մենք Իսպանիայում աշխատում ենք, դեռևս նորություն չկա»,- լրագրողների հետ զրույցում, անդրադառնալով ՀՔԾ պետի և ԱԱԾ պետի հայտնի գաղտնալսման պատվիրատուների բացահայտմանը, հայտարարեց ԱԱԾ պետ Արթուր Վանեցյանը:
Նա նշեց, որ հիմա էլ չի վախենում, որ իրեն կձայնագրեն ու հայտարարեց, որ կարող է իր հեռախոսային խոսակցությունները հեռարձակել ուղիղ եթերով՝ բացառությամբ պետական գաղտնիք պարունակողների:
Նա նշեց՝ գիտեն այն շրջանակը, որը պատվեր է տվել, բայց կոնկրետ փաստեր չունեն: Արթուր Վանեցյանը մանրամասնեց. «Սեպտեմբերի վեցից այդ տեսանյութը եղել է համացանցում և սեպտեմբերի 11-ին է դարձել հանրության լայն շերտերին հասանելի: Եվ ինչն է եղել պատճառը, քանի որ տեղեկությունը տարածելու և հետքեր չթողնելու համար պիտի գործեին շատ լուրջ: Եթե կարողանայինք տեսանյութի տարածման սկզբնաղբյուրը ֆիքսել, հասկանալի է, որ կծիկը կկարողանայինք քանդել: Տարբեր ծրագրեր այլ երկրներից գաղտնագրում օգտագործելով, այդ ձայնագրությունը տարածվել է, ինչը պատճառ է, որ չենք կարողանում գտնել սկզբնաղբյուրը»:
Դառնալով ՀՀ կառավարության շենք մուտք գործած անձի ինքնությանը՝ Արթուր Վանեցյանն ասաց. «Այդ քաղաքացին Նուբարաշենի բնակիչ է՝ նախկին ազատամարտիկ, որը հաշվառված է հոգեբանական կլինիկայում և նա, իր ասածով, նշել է, որ աշխատանք է ուզում, իրեն աշխատանք չեն տալիս և ուզում է այդ կերպ ուշադրություն գրավել»:
Արթուր Վանեցյանն ասաց, որ հիմա իրենք օրուգիշեր աշխատում են, որ բացառեն ընտրակաշառքի դեպքերը. «Կան մարդկանց խմբեր, որոնք փորձում են իրականացնել նախապատրաստական աշխատանքներ ընտրակաշառք բաժանելու ուղղությամբ: Ասեմ, որ դա ոչ թե կուսակցության կենտրոնական գրասենյակներից տրվող հանձնարարությունների շրջանակներում է, այլ արջի ծառայություն մատուցող տարբեր խմբեր են»: Արթուր Դավթյանը հորդորեց, որ նման արկածախնդրության չգնան, քանի որ իրենց ձեռքերը երկար են և ամեն ինչ տեսնում են:
Տաթև ՀԱՐՈՒԹՅՈՒՆՅԱՆ
