Այսօր Երեւանի ավագանու արտահերթ նիստի օրակարգում էր ընդգրկված աուդիտորական ծառայություններ ներգրավելու մասին որոշման նախագիծը:
Փոխքաղաքապետ Հայկ Սարգսյանն այս հարցի զեկուցման ժամանակ ասաց, որ ավագանին պարտավոր է ամեն տարի հաստատել տվյալ տարվա ֆինանսատնտեսական գործունեության արտաքին աուդիտի անցկացման նպատակով աուդիտորական ընկերության ընտրությունը: Այս նախագծի նպատակը քաղաքի բյուջեի կատարման վերահսկողությունն իրականացնելու նպատակով ուսումնասիրություն իրականացնելն է:
Մրցույթի միջոցով կընտրվի այն կազմակերպությունը, որն իրականացնելու է արտաքին աուդիտը:
Արդյո՞ք այս աուդիտը ենթադրում է, որ ուսումնասիրվելու են քաղաքապետարանի ենթակայության տակ գտնվող կառույցները, հիմնադրամներն, այդ թվում նաեւ՝ «Երեւան» հիմնադրամը,-հետաքրքրվեց ավագանու անդամներից մեկը: Այս հարցի առնչությամբ փոխքաղաքապետն ասաց.«Արտաքին աուդիտը ներառելու է Երեւան քաղաքի քաղաքապետարանի ամբողջ համակարգի գործունեության ֆինանսատնտեսական արդյունքների ուսումնասիրություն, որի մեջ մտնելու են ամբողջ համակարգի, այդ թվում՝ համայնքային ոչ առեւտրային կազմակերպություններ, փակ բաժնետիրական ընկերություններ: Սակայն աուդիտի գործառույթները չեն իջնելու գործառնությունների մակարդակի ձեր նշած կառույցներում: Սրանք ընդհանուր ֆինանսատնտեսական արդյունքների ուսումնասիրություններ են լինելու»:
Որոշումն ընդունվեց, ավագանին կողմ քվեարկեց նախագծին:
Նելլի ԲԱԲԱՅԱՆ
