«Սասնա ծռեր» համահայկական կուսակցության պատգամավորի թեկնածու Ստեփան Գրիգորյանն այսօր Արարատի մարզի Մխչյան գյուղում խոստացավ, որ ընտրվելու դեպքում առաջինը բարձրացնելու է Սյունիքի մարզպետ Հունան Պողոսյանի հարցը:
«Էն, որ մի հատ կա է, Սյունիքի մարզպետ, ասաց՝ չջղայնացնեք ինձ, ես կհիշեմ, որ ոստիկան եմ: Ես ՀՀ քաղաքացի եմ, կբերեմ, կկանգնացնեմ Ազգային ժողովի ամբիոն ու կասեմ՝ մի հատ ասա, լսեմ էլի, ի՞նձ ես վախացնում, թե՞ «Սասնա ծռերին», չեմ ուզում էդ բառն ասեմ՝ ես կլացացնեմ, խոստում եմ տալիս, բանակն իմ թիկունքին կանգնի, ես իրան կլացացնեմ: Ոչ մեկ իրավունք չունի նսեմացնել հայ ժողովրդին, բոլոր պաշտոնյաները դա պետք է հանեն իրենց մեջից, իրենք ծառա են հայ ժողովրդին, այ դա՛ է կարեւոր»,- ասաց Ստեփան Գրիգորյանը:
Նրա խոսքով` նոր ձեւավորվող խորհրդարանում պետք է լինեն ազնիվ մարդիկ. «Մենք սովոր ենք, որ Ազգային ժողովը տականքների տեղ է, ոչ սկզբունքային մարդկանց տեղ է, երեսփոխանների տեղ է, որ ամեն օր երես են փոխում: Ես որոշեցի տղերքի հետ գնամ, որ կամաց-կամաց մաքրենք, Ազգային ժողովը մաքրենք քաղաքական թափոններից, նաեւ գալիս ենք աջակցելու Նիկոլ Փաշինյանին, տարաձայնություններ կան, համընկնող բաներ էլ կան, բայց ոնց եք պատկերացնում, Ազգային ժողովում մի ուժ գերակշռի, որ կառավարության անդամները ափըռ-ցփըռ խոսում են: Ազգային ժողովում հակակշիռ ուժ պետք է լինի, որը հարցեր բարձրացնի»:
Արփինե ՍԻՄՈՆՅԱՆ
