Այսօր ՀՀԿ երիտթեւի նորընտիր ղեկավար Հայկ Մամիջանյանը «Հայելի» ակումբում հրավիրված ասուլիսում, անդրադառնալով իրենց սեւ ու սպիտակ քարոզչական պաստառներին, ասաց, որ դա լավ քարոզչական հնարք էր ու աշխատեց, քանի որ դրա մասին խոսում են վարչապետը, փոխվարչապետը: Ըստ նրա՝ հիմա ծայրահեղ բեւեռացված հասարակությամբ են մտնում ընտրական պրոցեսի մեջ: Aravot.am-ի հարցին՝ դեկտեմբերի 9-ի հետ կապված տարբեր կանխատեսումներ են հնչում, Նիկոլ Փաշինյանը հայտարարեց, որ այդ օրը լինելու է ՀՀԿ-ի քաղաքական մահվան օրը, «Լուսավոր Հայաստանից» Արման Բաբաջանյանը հայտարարեց, որ դա լինելու է անցյալի մնացորդների հուղարկավորության օրը, այնուամենայնիվ, այդ օրը հուղարկավորություն սպասե՞նք եւ ո՞ւմ հուղարկավորությունն է լինելու: Մամիջանյանը պատասխանեց, որ ի տարբերություն մեր նշած մարդկանց, ինքը բախտագուշակ չէ ու սուրճի բաժակ նայելով չի զբաղվում. «Կրթությամբ քաղաքագետ եմ ու կարող եմ 100 տոկոսով ասել, որ ռեյտինգային համակարգով իրականացվող ընտրությունների կանխատեսումն աշխարհի ամենաանշնորհակալ գործն է: Մարդիկ քվեարկում են անձերի, մարդիկ կարող է այնքան էլ երջանիկ չլինեն ՀՀԿ-ի գոյության կամ քաղաքական կուրսի հետ, բայց լավ վերաբերվեն օրինակ Հայկ Մամիջանյանին, ով առաջադրված է, այնինչ, Մամիջանյանը հանդիսանում է ՀՀԿ անդամ: Այնպես որ վարչապետը, բոլոր քաղաքագետները, լրագրողները, որոնք այդ օրը պլանավորել են մատուցել խաշլամա, ինձ թվում է՝ սոված են մնալու»:
Հռիփսիմե ՋԵԲԵՋՅԱՆ
