«Բարգավաճ Հայաստան» կուսակցության կողմից առաջադրված Վարուժան Բաբաջանյանի խոսքով՝ ԱԺ արտահերթ ընտրությունների նախընտրական քարոզարշավը թողնում է մսուր-մանկապարտեզի տպավորություն. «Քանի որ մենք ցուցակներում ունենք քաղաքականությամբ չզբաղված ու պատահականորեն այստեղ հայտնված մարդկանց, դրա համար էլ նման տպավորություն ունեմ: Իրականում այս քարոզարշավը շատ անորակ է»:
Խոսելով այն մասին, թե ինչ հարցերով են քաղաքացիները դիմում իրենց, Վարուժան Բաբաջանյանն ասաց. «Երեկ ես քարոզարշավը սկսեցի մանկավարժների հետ մեծ հանդիպումով: Քանի որ ես ևս մանկավարժ եմ, դասախոսում եմ, քարոզարշավն այդպես սիմվոլիկ սկսեցինք՝ քննարկելով կրթական հարցեր»:
Վարուժան Բաբաջանյանն ընդգծում է նաև, որ նախընտրական քարոզարշավի ընթացքում չի տեսնում վարչական ռեսուրսի չարաշահման պետական հրաման. «Վարչական լծակների օգտագործումը ոչ թե կառավարության հրահանգն է, այլ թեկնածուները, ովքեր ազդեցիկ չեն, նրանք իշխանության անունից մոտենում են քաղաքացիներին, փորձում ձայն հավաքել, որպեսզի հետագայում պաշտոն ստանան»:
Բանախոսը, անդրադառնալով նաև Նիկոլ Փաշինյանի «ասֆալտին փռելու» հայտարարություններին, ասաց. «Մեր պետական ինստիտուտները ոտքի փալաս են սարքում: Չեմ կարողանում հասկանալ, թե ինչու՞ է ամեն անգամ որևէ երևույթից հետո Նիկոլ Փաշինյանը գոռգոռում, թե մարդկանց կփռի ասֆալտին: Վերջիվերջո սա պետություն է, ոչ թե բոստան»:
Բաբաջանյանի խոսքով՝ Նիկոլ Փաշինյանը չի կարող պետությունը ղեկավարել՝ հենվելով էմոցիաների վրա:
Մարիամ Հակոբյան
