ՀՀ վարչապետի ժամանակավոր պաշտոնակատար, «Իմ քայլը» դաշինքի առաջնորդ Նիկոլ Փաշինյանն այսօր Սպիտակում, երբ անդրադարձավ դաշինքի պատգամավորի թեկնածու, ազատամարտիկ Սասուն Միքայելյանի՝ քննադատված հայտարարությանը, դիմեց նրան քննադատողներին, այդ թվում՝ որոշ ՀՀԿ-ականներինծ, Մանվել Գրիգորյանին պաշտպանողներին եւ ասաց. «Ձեզանից ոմանք նույնպիսի պահեստներ ունեն որոշ տեղերում, մենք էլ գիտենք այդ պահեստների տեղը, ունենք լուսանկարները, բացահայտել ենք: Շատ բան չենք ասում, որովհետեւ ազգային անվտանգության եւ պետական գաղտնիքի խնդիր կա»:
Ապա Փաշինյանը նշեց, որ ՀՀ գլխավոր դատախազին հրահանգել է ուսումնասիրել, թե ինչ սնունդ է մատակարարվում զինվորին. «Հատ-հատ գտնելու եմ որոշներին եւ պատասխանատվության ենթարկելու՝ ինչ կոչում էլ ունենան»: Վարչապետի պաշտոնակատարը, կրկին դառնալով Սասուն Միքայելյանին քննադատողներին, նրանց «ազատամարտի պաշտպաններ» անվանեց, ապա նշեց. «Սերժ Սարգսյանի եղբոր բանկային հաշվում երեսուն միլիոն դոլար կա: Ոչ-ոք չհարցրեց՝ այդ որտեղի՞ց այդ գումարը, այն դեպքում, երբ զինվորը ներքնազգեստ չունի, ա՜յ թալանչի ստահակներ: Բոլոր միլիոնների հետեւից գնալու ենք եւ ձեռքներիցդ առնելու: Այդ բոլոր փողերը պետք է վերադարձվեն բանակին եւ ժողովրդին: Պատրաստվե՜ք: Ձեռքներիցդ առնելու ենք ձեր թալանած վերջին կոպեկը»:
Ապա Փաշինյանը շեշտեց. «Չեմ բացառում, որ այս գործընթացի արդյունքում ոմանք բոմժ դառնան, որովհետեւ բոմժ են եղել, նրանք պետք է վերադառնան իրենց նախնական կարգավիճակին»:
Հիշեցնենք, որ դեկտեմբերի իննին տեղի կունենան արտահերթ ԱԺ ընտրությունները:
Լուիզա ՍՈՒՔԻԱՍՅԱՆ
