«Մեր երկիրը տնտեսական մրցակցության ոլորտում աննախադեպ առաջընթաց է արձանագրել»,-այսօր հայտարարեց Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը՝ հրավիրած ասուլիսում: Պարոն Շաբոյանը ներկայացրեց տարեկան գործունեության հաշվետվությունը: Ըստ նրա, Համաշխարհային տնտեսական ֆորումի այս տարվա գնահատականներով Հայաստանը 2018 թ.-ին մրցակցության ոլորտում իր դիրքերը բարելավել է 9 կետով եւ ներկայումս աշխարհի 140 երկրների շարքում զբաղեցնում է 19-րդ հորիզոնականը՝ նախորդ տարվա 28-ի փոխարեն:
Արտակ Շաբոյանի խոսքով` այս ցուցանիշները վկայում են այն մասին, որ Հայաստանը առաջ է ԵԱՏՄ անդամ մյուս երկրների համեմատությամբ, ինչպես նաեւ տարածաշրջանի, ԱՊՀ անդամ և Արեւելյան Եվրոպայի մի շարք երկրներից։
«Եթե նախկինում կարագի շուկայում գործել է թվով 24 տնտեսվարող, ապա այս տարվա տվյալների համաձայն՝ ներմուծողները 57-ն են: Կարագի շուկայում գերիշխող տնտեսվարողի մասնաբաժինը նշված ժամանակահատվածում նվազել է՝ 74%-ից դառնալով 49%: Ալյուրի շուկայում 2014-ի 30 տնտեսվարողի փոխարեն 2018-ին գործում են արդեն 149-ը, խոշորների մասնաբաժինն այս դեպքում եւս նվազել է՝ դառնալով 38 %-ից 5%, ինչը նշանակում է, որ ալյուրի շուկայում գերիշխող տնտեսվարողներ չկան»,-ասաց ՏՄՊՊՀ ղեկավարը՝ նշելով, որ հանձնաժողովի ուշադրության կենտրոնում են սոցիալական նշանակության ապրանքները: Նրա խոսքով, այս մասով մրցակցային միջավայրը բարելավվել է, ավելացել է տնտեսվարողների, ներկրողների թիվը, նվազել է «Ալեքս հոլդինգի» մասնաբաժինը. «Շաքարավազի մասով 4 տարվա կտրվածքով ներմուծողների թիվը դարձել է 36-ից 62, իսկ գերիշխողի մասնաբաժինը նվազել է 94-ից՝ հասնելով 78%-ի: Բանան ներմուծող 9 տնտեսվարողի փոխարեն այսօր ներկրմամբ են զբաղվում 21-ը, իսկ գերիշխողի մասնաբաժինը նվազել է 92%-ից՝ հասնելով 56%-ի»:
ՏՄՊՊՀ ղեկավարի խոսքով, Հայաստանում տնտեսվարողների քանակը սկսել է ավելանալ 2015 թվականից սկսած, ինչը , հիմնականում, պայմանավորված է ԵԱՏՄ անդամակցությամբ:
Պատասխանելով այն հարցին, թե ինչով է պայմանավորում իր պաշտոնավարման շարունակությունը նոր իշխանությունների օրոք էլ, Արտակ Շաբոյանն ի պատասխան ասաց. «Ես նույն ոգով, նույն եռանդով շարունակում եմ աշխատել, մեր կառույցը քաղաքական գործընթացների հետ չի առնչվում եւ բարեխղճորեն շարունակում ենք աշխատել: Իմ պաշտոնավորման հետ կապված որեւէ արտառոց երեւույթ չկա, ես ավելի քան 20 տարի պետական կառավարման համակարգում եմ աշխատում»: Նրա խոսքով. «Ես երբեք պաշտոնից կառչած չեմ եղել, համաձայն օրենսդրության՝ վարչապետը կարող է նոր թեկնածու ներկայացնել, եւ նա ցանկացած պահի կարող է դա անել: Նորմալ մարդու համար պաշտոնը մեծ բեռ եւ պատասխանատվություն է ներկայացնում»:
Լուսինե ԲՈՒԴԱՂՅԱՆ
