Ուկրաինայի Գերագույն ռադան ֆինանսների նախարարի պաշտոնակատար է նշանակել հայազգի Օքսանա Մարկարովային: Վերջինիս նշանակմանը կողմ է քվեարկել 242 պատգամավոր, մինչդեռ անհրաժեշտ էր առնվազն 226 ձայն:
Մարկարովան ֆինանսների նախարարությունում աշխատում է 2015թ. մարտից: 2016թ. ապրիլից նա նշանակվել էր ֆինանսների նախարարի առաջին տեղակալ, իսկ 2016թ. օգոստոսի 8-ին՝ ներդրումների հարցերով կառավարության լիազոր ներկայացուցիչ:
Մարկարովան ծնվել է 1976թ. հոկտեմբերի 28-ին հայի և ուկրաինուհու ընտանիքում:
Ուկրաինան Եվրոպայում երկրորդ ամենահայաշատ երկիրն է Ֆրանսիայից հետո. այստեղ ապրում է մոտ 500 հազար հայ: Օքսանա Մարկարովան Ուկրաինայում երկրորդ հայազգի նախարարն է, մյուսը ներքին գործերի նախարար Արսեն Ավակովն է:
Պատրաստեց՝ Վիկտորյա ԱՆԴՐԵԱՍՅԱՆԸ
