ՀՀ առաջին փոխվարչապետի պաշտոնակատար Արարատ Միրզոյանի գլխավորությամբ տեղի ունեցած Բաց կառավարման գործընկերություն (ԲԿԳ) նախաձեռնության աշխատանքային խմբի նիստում հաստատվել է ԲԿԳ գործողությունների չորրորդ ծրագիրը:
Նախաձեռնության նպատակն է քաղաքացիական հասարակության ակտիվ ներգրավմամբ նպաստել կառավարման համակարգի բարելավմանը, խթանել վերջինիս արդյունավետությունը՝ բարձրացնելով պետություն-քաղաքացի հարաբերությունների թափանցիկության, վստահելիության և հաշվետվողականության մակարդակը:
2018-2020թթ. ԲԿԳ գործողությունների չորրորդ ծրագիրը բաղկացած է 11 հանձնառություններից, որոնցից 6-ը հանդիսանում են քաղաքացիների և հասարակական կազմակերպությունների կողմից ներկայացված առաջարկները:
ՀՀ կառավարության աշխատակազմի ներկայացուցիչ, Բաց կառավարման գործընկերության քարտուղար Լիլյա Աֆրիկյանը Aravot.am-ին հայտնեց, որ քննարկման արդյունքում խմբի կողմից հավանության են արժանացել հետևյալ հանձնառությունները՝ պաշտոնական հայտարարագրերի ցանկի ընդլայնում, պետական բյուջեից դրամաշնորհների մրցույթային կարգի սահմանում, իրական սեփականատերերի ռեգիստրի մշակում, վարկային և դրամաշնորհային միջոցների թափանցիկության ապահովում, համայնքային կայքերի հասանելիություն և արդիականացում, ջրային և հողային ռեսուրսների ինտերակտիվ քարտեզի մշակում, կրթության և առողջապահության ոլորտի հասանելիության ապահովում, հանրագրերի համակարգի ներդրում:
Աֆրիկյանն ասաց, որ քննարկումներին մասնակցել են ՀԿ-ների, պետական մարմինների և միջազգային կազմակերպությունների շահագրգիռ ներկայացուցիչները:
Նրա խոսքով, հավանության են արժանացել այն հանձնառությունները, որոնք առավել համապատասխան են ԲԿԳ սկզբունքներին: Կարևորվել է նաև դրանց շեշտակի փոփոխություններ ենթադրող առաջարկներ լինելը:
Aravot.am-ը փորձեց ճշտել, թե ովքեր կարող են առաջարկով հանդես գալ և ինչ ժամկետներ են սահմանված: «Առաջարկ ներկայացնելու սահմանափակում չկա: Հայտարարվում է բաց մրցույթ ՀՀ քաղաքացիների համար առանց տարիքային, մասնագիտական չափանիշների դասակարգման: Այս տարի առաջարկներով են հանդես եկել ՀՀ պետական կառավարման մարմինները, քաղաքացիական ծառայողները, ՀԿ-ներն ու ՀՀ քաղաքացիները»:
Խոսելով ժամկետների մասին, ԲԿԳ քարտուղարն ասաց, որ առաջարկների ներկայացման ժամկետը երկու ամիս և ավելի է, սակայն այս տարի՝ հաշվի առնելով քաղաքական զարգացումները, առաջարկների մեկնարկը եղել է երկու փուլով՝ մարտին և հուլիսին:
Նշենք, որ ՀՀ-ն Բաց կառավարման գործընկերություն նախաձեռնությանը միացել է 2011թ.-ի սեպտեմբերին և ԲԿԳ-ին միացած ամենաակտիվ 71 երկրներից մեկն է:
Սոնա ԳԵՎՈՐԳՅԱՆ
